Кулун тутар 1 күнүгэр, С.С.Васильев-Борогонскай аатынан улуустааҕы киин библиотекаҕа, Лаврентий Иванович Новогодин 80 сааһын көрсө, "Дьыалабыай оонньуу" ыытылынна. Тэрээһини Лаврентий Иванович кэргэнэ уонна оҕолоро, ону тэҥэ киин библиотека коллектива тэрийэн ыыттылар. Оонньууга барыта 22 улууспут чаҕылхай ыччата кыттыыны ылла, 7 хамаандаҕа арахсан бэйэлэрин бырайыактарын дьүүллүүр сүбэ иннигэр көмүскээтилэр.

Дьүүллүүр Сүбэ бэрэссэдээтэлинэн Улуус баһылыгын солбуйааччы Сторожев Анатолий Дмитриевич, чилиэннэринэн улууспут дьаһалтатын үлэһиттэрэ буоллулар. Хамаандалар туризм, ыччат хамсааһынын сайыннарыы, оҕону кыра эрдэхтэн үлэҕэ сыһыарыы о.д.а. темаларга олус үчүгэй бырайыактары оҥорбуттарын дьүүллүүр сүбэ бэлиэтээтэ. Түмүккэ, 1-кы миэстэни ылбыт хамаанда 30000 солкуобай уу харчынан, анал кубогынан наҕараадаланна, бирииһи Лаврентий Иванович кэргэнэ уонна оҕолоро туруордулар. 2-с миэстэни ылбыт хамаанда 20000 солкуобай харчыны ылла, бирииһи Лаврентий Иванович бииргэ төрөөбүттэрэ, чугас дьоно туттардылар. 3-с миэстэни ылбыт хамаанда Улуус администрацията туруорбут 10000 солкуобай сууммалаах сертификатын тутта. Түмүккэ, маннык тэрээһиннэр улуус кадровай хааччыллыыта сайдарыгар олус наадалааҕын эттилэр!

Альбина Дегтярева
Киин библиотека директорын солбуйааччы