Бүгүн, муус устар ый 10 күнүгэр, Дьокуускай куораттан Саха Өрөспүүбүлүкэтин Үүнэр көлүөнэ тыйаатырын артыыстара: Саха Өрөспүүбүлүкэтин искусствотын үтүөлээх үлэһитэ, кылаабынай режиссер Александр Титигиров, эдэр артыыстар Ньургун Черов, Айыына Слепцова, Евгений Шамаев, Никита Соловьев, Лиза Далбараева, Татьяна Хомподоева, Спартак Ларионов, Катя Хойутанова, Кирилл Рожин, Арсен Семенов, худуоһунньук Гоша Аммосов, менеджер Мария Викторовна Андреева, биир дойдулаахтарбыт Саха Өрөспүүбүлүкэтин култууратын туйгуна Владислав Портнягин, администратор Татьяна Васильевна Аммосова кэлэн оҕолорго хотугу норуоттар остуоруйаларынан "Кэҕэ" испэктээкили икки төгүллээн көрдөрөн оҕолор, төрөппүттэр, учууталлар сэҥээриилэрин ыллылар. Ону тэҥэ "Хара дьай" диэн Ф.М.Достоевскай " Преступление и наказание" романынан испэктээги көрдөрөллөр.

Биир үтүө түгэнинэн оҕолор тыйаатыр артыыстарын кытары көрсөн " атах тэпсэн олорон" кэпсэтиилэрэ буолла. Манна сахалыы киинэҕэ, сериалга оонньообут сөбүлүүр артыыстара тыйаатыр, сериал туһунан бэйэлэрин санааларын үллэһиннилэр, артыыс идэтин, театр үлэһиттэрин туһунан, артыыс идэтигэр ханна үөрэммиттэрин, эксээмэҥэ тугу хайдах толорон киирбиттэрин кэпсээтилэр. Оҕолор боппуруостарыгар эппиэт ылан үөрдүлэр, астынан тарҕастылар.