Рейтинг:  0 / 5

Звезда не активнаЗвезда не активнаЗвезда не активнаЗвезда не активнаЗвезда не активна
 

Улуустааҕы кииннэммит библиотека тиһигэр кинигэ – күндү бэлэх тиһигин быспакка киирэр. Ол курдук, бу дьыл атырдьах уонна балаҕан ыйдарыгар улууспут дьаһалтата, Лөгөй орто оскуолата, олохтоох автордар – кыраайы үөрэтээччилэр бэлэхтэрэ кииннэммит тиһик кинигэтин пуондатын байыттылар.

Улуус дьаһалтата улууспут, республикабыт историятыгар сыһыаннаах биһиги пуондабытыгар урукку өттүгэр суох кинигэлэри, ону таһынан кырачааннарга аналлаах Николай уонна Дария Татариновтар «Таал–Таал эмээхсин» остуоруйатын хас да экземлярын, барыта 64 араас кинигэ бэлэхтээтэ.

Лөгөй оскуолатын 75 сыллаах үбүлүөйүгэр аналлаах «Лөгөй сирэ – үөрэх, билии биһигэ» оскуола выпускниктарын, учууталларын кытта ыкса сибээстээх кинигэ иккис чааһа уонна «Творческий процесс взаимодействия учащегося, учителя и родителя» - оскуола научнай – чинчийэр үлэтин сырдатар хомуурунньук дьоһун бэлэх буолла.

Улуус биллэр кыраайы үөрэтээччитэ Пестряков Геннадий Дмитриевич хомуйан оҥорбут «Якутяне, воевавшие в штрафных подразделениях» кинигэтэ Аҕа дойду Улуу сэриитигэр биһиги биир дойдулаахтарбыт кыттыыларын туһунан урут ситэ үөрэтиллибэтэх түгэннэри сырдатар. Кинигэ В.А. Протодьяконов – Кулантай аатынан Майаҕас орто оскуолатын ситиһиилээхтик үөрэнэн бүтэрбит Айталана Пухова научнай –чинчийэр үлэтигэр олоҕуран оҥоһуллубут. Айталана бу үлэтинэн кыттан В.И. Вернадскай аатынан Бүтүн Россиятааҕы ыччат ааҕыытын лауреатын үрдүк аатын ылбыта. Манна даҕатан эттэххэ, Геннадий Дмитриевич өрүү таһааттарбыт кинигэлэрин библиотекаҕа анаан биэрэр.

Эмиэ кыраайы үөрэтээччи Нафанаилов Семен Гаврильевич «Даалылар» кинигэтэ 2021 сыллаахха тахсыбыта. Даалы былыргытыттан саҕалаан саас сааһынан суруллубут, төһө сири-уоту хабан тайаан сытарын, сэрии иннинээҕи, кэннинээҕи сылларын хабан, күүстээх үлэни ыыппыт кыра сир боростуой дьонун, аҕа уустарын төрүччүлэрин туһунан элбэх архыып докумуоннарыгар олоҕуран суруллубут кинигэ дьон – сэргэ биһирэбилин ылбыта. Автор бэйэтинэн кэлэн кинигэтин үөрэн –көтөн туран библиотека пуондатыгар бэлэх уунна.

            Биир дойдулаахпыт учуутал идэлээх Бурцева Марианна Владимировна оҥорсубут «Города и реки» диэн ааттаах остуол оонньуута ыччат дьон болҕомтотун тардарыгар эрэнэбит.

            Кииннэммит тиһик ааҕаачыларын аатыттан кинигэ бэлэх туппут дьоммутугар истиҥ махталбытын тиэрдэбит.