Улуу Кыайыы 77, Саха АССР тэриллибитэ 100, бөдөҥ государственнай- общественнай деятель, поэт, публицист, П.А. Ойуунускай аатынан Саха АССР Государствннай бириэмийэтин лауреата С.С.Васильев – Борогонскай төрөөбүтэ 115 сылыгар анаан улууспут бары нэһилиэктэригэр үтүө үгэс буолбут биир кэмнээх күргүөмүнэн ааҕыы тэрээһиннээхтик ыытылынна. Улуус киинигэр Бороҕоҥҥо Улуу Кыайыы күнүгэр Батыйа комплекска  үөрүүлээх митинг кыттыылаахтара   Сергей Васильев-Борогонскай хоһоонун долгуйан туран доргуччу аахтылар. 

Күргүөмүнэн ааҕыыга улуус оскуолаларын үөрэнээччилэрэ, үлэ коллективтара, общественнай түмсүүлэр, ветераннар,  барыта 3196 киһи көхтөөхтүк кытынна. Санатан эттэххэ, бастакы ааҕыы Улуу Кыайыы 70 сыллаах өрөгөйдөөх үбүлүөйүн сылыгар улуус дьаһалтатын, үбүлүөйдээҕи тэрээһин комиссия, С.С. Васильев-Борогонскай аатынан киин библиотека тэрийиитинэн ыытыллыбыта. Быйылгы ааҕыылары улуустааҕы кииннэммит тиһигин сэргэ улуустааҕы үөрэх управлениета тэрийдэ. Инникитин даҕаны улууспут дьоно сэргэтэ сэргээн кыттар тэрээһинэ тиһигин быспакка сылын аайы ыытыллыа диэн эрэнэбит.