Уус – Алданнааҕы кииннэммит тиһик библиотекаларыгар Саха сиригэр Үлэ сылынан, Бүтүн Россия үрдүнэн ыытыллар Библиотека күнүнэн уонна «Бииргэ ааҕабыт» республиканскай фестиваль чэрчитинэн 5-с төгүлүн «Кинигэ күүһэ» биир кэлим республиканскай акция ыытылынна.
С.С. Васильев – Борогонскай аатынан киин библиотека ааҕар саалатыгар «Уһуктуу» улуустааҕы литературнай түмсүү кыттыылааҕа, «Мүрү саһарҕата» хаһыат общественнай корреспондена Елена Николаевна Сыроватская Мүрү 1- гы нүөмэрдээх орто оскуолатын 8 кылааһын үөрэнээччилэригэр народнай суруйааччы В.С. Яковлев-Далан «Дьикти саас» романыттан быһа тардан аахта. Ааҕыы кэнниттэн оҕолор Кеша Попов – Гассан үтүө быһыытын ырыттылар, санааларын үллэһиннилэр. Маннык ааҕыылар өссө да ыытыллалларыгар баҕа санааларын эттилэр.
Оҕо уонна ыччат ааҕар киинигэр Мүрү N 1 –дээх орто оскуолатын директоры иитэр үлэҕэ солбуйааччы Алексей Михайлович Мигалкин 2 «б» кылаас оҕолоругар Роберт Льюис Стивенсон «Остров сокровищ» кинигэтиттэн быһа тардан аахта. Оҕолор кинигэни ааҕыы, спорт, история туһунан Алексей Михайловичтан элбэҕи ыйыттылар, салгыы кылаас чааһыгар өссө да көрсүөх буолан тарҕастылар.
