Саха Өрөспүүбүлүкэтин Национальнай библиотеката, М.К.Аммосов аатынан Хотугулуу — Илиҥҥи Федеральнай университета, Россия Хотугулуу- Илиҥҥи олохтоох омуктар тылларын уонна культураларын института, саха тылын кафедрата тэрийиилэринэн С.С.Васильев – Борогонскай аатынан Уус Алдан улууһун киин библиотекатыгар, олунньу 14 күнүгэр «Сахалыы дьыктаан » ыытылынна. Барыта 31 кыттааччы кэлэн бэйэтин тургутунан көрдө.
Тэрээһин Реас Алексеевич кыыһа Россия уопсай үөрэхтээһинин туйгуна, норуот дипломата, элбэх бырайыак ааптара Лариса Реасовна Кулаковская эҕэрдэтинэн саҕаланна. Бүгүҥҥү дьыктааҥҥа поэт, прозаик Реас Алексеевич Кулаковскай төрөөбүтэ 110 сылыгар анаан “Биир ууга үс хонук” кэпсээниттэн быһа тардан 191 тыллаах тиэкис ааҕылынна.
Түмүккэ, “Үчүгэй суруксут” – Гаврильева Анна Васильевна, “Бастыҥ суруксут”– Сыроватская Сардана Николаевна, “Бастыҥтан бастыҥ суруксут” – Иванова Сардана Захаровна, “Кыраһыабай буочар” – Иннокентьева Лиана Павловна диэн анал ааттар үөрүүлээх быһыыга-майгыга туттарыллыннылар.
Бары кыттыылаахтарга тэрийээччилэр ааттарыттан махталбытын тиэрдэбит. Кыттааччылар үлэлэрин бэрэбиэркэлиир кэмҥэ «Алгыс» кыраайы үөрэтэр отдел салайааччыта Ольга Николаевна Павлова Иван Арбита айар үлэтин, айымньыларын туһунан бэсиэдэни иһиттилэр. Уус Алдаҥҥа библиотека тэриллибитэ 100 сыллаах үбүлүөйүгэр аналлаах быыстапканы көрдүлэр.
