Олоҥхо — бу саха норуотун өркөн өйө, сырдык санаата, үрдүккэ, кэрэҕэ дьулуһуута. Олоҥхо аан дойду хайдах айыллыбытын, олох үөскээбитин, саха омук хайдах сайдыбытын, кини олоҕун-дьаһаҕын, майгытын-сигилитин, өйүн-санаатын күүһүн кэпсиир судү айымны.
Сэтинньи ый 17 күнүгэр «Олоҥхо Дьиэтэ” этнокултуурнай кииҥҥэ биллиилээх олоҥхоһут Бурнашев Николай Петрович -Боодоҕос төрөөбүтэ 150 сылыгар аналлаах Олоҥхо уонна Хомус ыйыгар аналлаах тэрээһиннэр оҕолор Олоҥхону толорууларыттан саҕаланнылар.
С.С. Васильев — Борогонскай аатынан киин библиотеката туруорбут «Олоҥхо биһигэ – Уус Алдан” улуустан төрүттээх олоҥхоһуттар, хомусчуттар, хомус уустарын тустарынан быыстапкатын Мария Петровна Заболоцкая билиһиннэрдэ.
Биллэр олоҥхоһуттар Лөгөй нэһилиэгиттэн Бурнашев Николай Петрович-Боодоҕос төрөөбүтэ150 уонна Өлтөх нэһилиэгиттэн Данилов Иван Иванович – Тойтуун Уйбаан 135 сылларыгар аналлаах «Олоҥхону толорууга утумнаахтык” улуустааҕы оҕолор ортолоругар олоҥхону толорууга күөн-күрэс ыытылынна.
