Ахсынньы 11 күнүгэр, Россия Наукатын академиятын Сибиирдээҕи салаатын Гуманитарнай чинчийиигэ уонна хотугу аҕыйах ахсааннаах омуктар кыһалҕаларын үөрэтиигэ институтун балаҕаныгар «Күрүлгэн” журнал, “Кыым” хаһыат, “Кыым.ру” сайт редакцияларын, ону сэргэ Хаҥалас, Уус Алдан библиотекаларын тиһиктэрин салалталарын, Н.Н. Павлов, Н.З. Копырин, Г.Р. Кардашевскай аймахтарын өйөөһүннэринэн тэриллибит Н.Н. Павлов-Тыаһыт «Луохтуур алҕаһа” кэпсээнин ырытыыга-анаарыыга биллэрбит конкурстара түмүктэннэ. Конкурс Н.Н. Павлов-Тыаһыт эһиил төрөөбүтэ 120 уонна кини
айар үлэтин үөрэппит Н.З. Копырин быйыл төрөөбүтэ 100 сылларыгар ананан ыытылынна. Тэрээһиҥҥэ Николай Захарович Копырин кыргыттара Евдокия Николаевна, Валентина Николаевна, сиэнэ Полина Васильевна, Николай Николаевич Павлов-Тыаһыт уола Николай Николаевич Павлов кыттыыны ыллылар. Ученайдар Л. Н Романова, В.Б. Игнатьева, Л.П. Григорьева, М.П. Попова, С.Д. Мухоплева Николай Захарович научнай үлэтигэр анаммыт дакылааттарын аахтылар. Улуустан культура управлениетыттан, киин библиотекаттан, Өнөр нэһилиэгиттэн делегация киирэн кыттыыны ылла.
Дьүүллүүр сүбэҕэ О.К. Корнилова (Хаҥаластааҕы кииннэммит библиотекалар ситимнэрин директорын солбуйааччыта), О. Н. Павлова (Уус Алдан улууһун С.С. Васильев-Борогонскай аатынан улуустааҕы киин библиотекатын кыраайы үөрэтиигэ салаатын сэбиэдиссэйэ), Г.Г. Филиппов-Гаврил Билиикэп (филология наукатын доктора) үлэлээтилэр.
Күрэххэ барыта 19 үлэ киирдэ. Үлэлэр Амматтан, Бүлүүттэн, Горнайтан, Кэбээйиттэн, Намтан, Уус Алдантан, Үөһээ Бүлүүттэн, Хаҥаластан уонна Дьокуускайтан киирбиттэр. Биир үлэ Улан-Үдэ куораттан кэлбит. Саастарынан көрдөххө, студеннары сэргэ 88 саастаах ытык кырдьаҕаска тиийэ кытыннылар. Бастыҥ үлэлэр «Кыым» хаһыат “Кулуһун” уус-уран сыһыарыытыгар, “Күрүлгэн” журналга 2024 сыл устатыгар бэчээттэниэхтэрэ. Уус Алдан улууһун кииннэммит библиотека тиһигин бириэмийэтин Үөһээ-Бүлүүттэн Б.С. Макаров, Н.З. Копырин аат. бириэмийэни Өнөр орто оскуолатын учуутала А.Н. Громова, Г.Г. Филиппов тус бириэмийэтин «Уолан» гимназия учуутала Н.В. Бурцева, Н.Н. Павлов-Тыаһыт аат. бириэмийэни М.Е. Слепцов, Хаҥалас улууһун библиотекаларын ситимнэрин бириэмийэтин ХИФУ студентката М. Гаврильева, Г.Р. Кардашевскай бириэмийэтин Үөһээ-Бүлүүттэн учуутал С.Н. Васильева, Үөһээ-Бүлүү улууһун Ороһу оскуолатын. Г.Р. Кардашевскай аатын сүгэр 8- с кылааһын бириэмийэтин ХИФУ студентката И. Егорова туттулар. «Кыым» хаһыат, «Күрүлгэн» журнал биһирэбиллэрэ Амматтан Р. П. Винокурова-Оруоһаҕа, ГЧИ биһирэбиллэрэ Кэбээйиттэн С.Н. Самсонова-Сиибиктэҕэ, Үөһээ-Бүлүүттэн Н.П. Кардашевская-Куттаахха, Бүлүүттэн Е.Е. Ивановаҕа ананнылар.
