Бүгүн С.С. Васильев-Борогонскай аатынан улуустааҕы киин библиотекаҕа аҕам саастаахтар күннэрин көрсө Хоро нэһилиэгин ытык дьоно кэлэн ыалдьыттаан, көрөн-истэн, сэргээн аастылар. Майаҕастааҕы олохтоох бибилэтиэкэ сэбиэдиссэйэ Ксения Николаевна Кириллина түмэн, салайан, олохтоох дьаһалта өйөөн, көмөлөһөн аҕам саастаахтарыгар ураты болҕомтону уураллар.
Кэлбит ыалдьыттар бибилэтиэкэ устун экскурсиялаатылар, саҥа кинигэлэри сэҥээрэ көрдүлэр, билистилэр, дьиэҕэ ааҕарга талбыт кинигэлэрин уларсан, ааҕар саалаҕа турбут үһүс оскуола иһинэн үлэлиир “Кустук” уруһуйдьуттар быыстапкаларын сөҕө-махтайа көрдүлэр. Салгыы электроннай ресурса салаатын үлэтин, саҥа көрүҥ техникалары сэргээн, виар-ачыкыны кэтэн, сөҕөн тарҕастылар.
Кэлэн иһэр аҕам саастаахтар күннэринэн улууспут олохтоохторун, ытык-мааны дьоммутун эҕэрдэлиибит уонна библиотекаҕа кэлэн үлэ саҥа хайысхаларын, сонун быыстапкалары кэлэн көрөргүтүгэр ыҥырабыт.
