Ыам ыйын 20 күнүгэр С.С. Васильев — Борогонскай аатынан улуустааҕы киин библиотека кэллэктиибэ Арассыыйаҕа норуоттар сомоҕолоһууларын, Саха Өрөспүүбүлүкэтигэр култуура, Уус Алдан улууһугар түмсүү уонна бииргэ үлэлээһин сылларынан В.В.Никифоров-Күлүмнүүр аатынан култуура Дыбарыаһыгар Мүрү нэһилиэгин тэрилтэлэрин идэлээх сойуустарын икки ардыларыгар «ТҮМҮС. ООННЬОО. КЫАЙ!» интеллектуальнай оонньууну тэрийэн ыытта.
Күрэҕи киин библиотека «Уран тыл алыба” литературнай бөлөҕө хоһоонунан дьүһүйүүтэ арыйда. Уопсайа 8 тэрилтэттэн: Г.В.Егоров аатынан Мүрү 1 №-дээх орто оскуола идэлээх сойууһун “Тэтим”, Доруобуйа харыстабылын “Эмчит”, Мүрү 2-с №-дээх орто оскуола “Тускул”, В.В.Алексеев аатынан Мүрүтээҕи уолаттар гимназияларын “Уолан”, “Мүрүчээнэ” оҕо уһуйаанын “Виктория”, Мындаабатааҕы спортивнай оскуола “Төлөн”, Култуура үлэһиттэрин “Күн эйгэ», Судаарыстыба тэрилтэлэрин “Эрэл” хамаандалар күөн көрүстүлэр. Күрэҕи кииннэммит библиотека тиһигин директора Лена Семеновна Павлова иилээн-саҕалаан ыытта.
Оонньуу 5 түһүмэҕинэн: бастакы түһүмэх — “Тута боппуруостар”, иккис – “Кини кимий?”, үһүс — “Айымньы аатын, ааптарын таай”, төрдүс — “Ырыаны таай”, бэһис – “Тыл оонньуута” тыҥааһыннаахтык ыытылынна. Күрэх кыттааччылара бары билиилэрин тургутан илин-кэлин түһүстүлэр.
Күрэҕи маннык састааптаах дьүллүүр сүбэ сыаналаата: бэрэссэдээтэл Аммосова Галина Владимировна ааҕааччылары кытта үлэлиир отдел сэбиэдиссэйэ, Уус Алдан улуһун тэрилтэлэр икки ардыларынааҕы идэлээх сойуустар координационнай сэбиэтин бэрэссэдээтэлэ, Федорова Феврония Гаврильевна, информационнай-иһитиннэрэр киин сэбиэдиссэйэ, Портнягина Вера Алексеевна, Оҕо библиотекатын сэбиэдиссэйэ.
Оонньуу кэмигэр уус-уран самодеятельность кыттыылаахтара Евдокия Васильева, «Тойон Мүрү» култуура дыбарыаһын хормейстера Айыына Сивцева, Мүрү ырыа күрэҕин Гран При хаһаайката, “Эн сулускун” Өрөспүүбүлүкэтээҕи ырыа күрэҕин финалиһа Галина Матвеева, С.С.Васильев-Борогонскай аатынан улуустааҕы киин библиотека библиотекардарын квартета көрөөччүлэргэ музыкальнай эҕэрдэлэрин анаатылар.
Дьүүллүүр сүбэ түмүк таһаарар кэмигэр көрөөччүлэргэ анаан оонньуу ыытылынна.
Оонньуу түмүгүнэн 1 миэстэни- Г.В.Егоров аатынан Мүрү 1 нүөмэрдээх орто оскуола «Тэтим», 2 м. — Судаарыстыба тэрилтэлэрин «Эрэл», 3 м.- Култуура эйгэтин «Күн эйгэ» хамаандалара ылары ситистилэр.
Кыттыбыт бары хамаандалары, көрөөччүлэри, көхтөөх ыалдьааччылары кэлэн иһэр Россия үрдүнэн бэлиэтэнэр библиотека, СӨ ырыа күннэринэн эҕэрдэлээн туран С.С.Васильев-Борогонскай аатынан Киин библиотека кэллэктиибэ Иван Мигалкин тылларыгар, Анна Тотонова матыыбыгар “Библиотекарь кыргыттар” ырыанан тэрээһини үөрүүлээхтик түмүктээтэ.
Бука барыгытын кэлэн иһэр самаан сайынынан эҕэрдэлиибит, доруобуйаны, үлэҕэ-олоххо ситиһиини, өрүү түмсүүлээх, үтүө түмүктээх үлэни баҕарабыт.
