Бүгүн бибилэтиэкэ дьиэтин иһэ оҕо саҥатынан туолла . Биһиэхэ кырачаан доҕотторбут ыалдьыттаатылар. Уус Алданнааҕы реабилтационнай киин иһинэн үлэлиир «Кустук» сайыҥҥы оҕо лааҕырын оҕолоро кэлэн оонньоон, быыстапка көрөн, лиэксийэ истэн бардылар.
Оҕолорго Киин бибилэтиэкэ сүрүн бибилэтиэкэрэ Мария Заболоцкая сайын туһунан быыстапканы көрдөрдө. Бибилэтиэкэр Сахаайа Копырина электроннай бибилэтиэкэни, «Айыл5а ситимэ» экология киинин туһунан сырдатта. Салгыы оҕолор олус көхтөөхтүк билиини хаҥатар ыйытыылардаах оонньууга оонньоотулар. Онтон VR ачыкы кэтэн, виртуальнай эйгэҕэ киирэн таҕыстылар. Куйаар ситимин нөҥүө үлэлиир ааҕар Киин бибилэтиэкэрэ Сивцев Гаврил оҕолору аан дойду аатырбыт музейдарынан сырытыннарда, аттракцион пааркатыгар хатааһылатта. Түмүккэ оҕолор хамаандаҕа арахсан сахалыы остуол оонньууларыгар оонньоотулар. «Тэтим таас», «Балыксыт» оонньуулары ордук сэҥээрдибит диэтилэр.
Бу көрсүһүү оҕолорго саҥа билиини эрэ буолбакка, сайыҥҥы сынньалаҥ биир умнуллубат күнүн бэлэхтээбитэ буолуо диэн эрэнэбит.
