Ыам ыйын 21 күнүгэр «Сыккыс» библиотекаҕа «Сэһэргээ, эн, үөлээннээҕим» түмсүү дьылы түмүктүүр тэрээһинэ бэрт тэрээһиннээхтик, сэргэхтик ыытылынна. Тэрээһин түмсүү салайааччыта Н. М. Иванова нэһилиэккэ, улууска ыытылла турар үлэни-хамнаһы билиһиннэриититтэн саҕаланна. Салгыы библиотекарь А. Н. Готовцева Танда музейын төрүттээччи, РСФСР уонна Саха АССР оскуолаларын үтүөлээх учуутала, Саха АССР култууратын үтүөлээх үлэһитэ И. П. Готовцев олоҕун, айар үлэтин толору сырдатар «Үлэҕэ анаммыт олох» саҥа кинигэни билиһиннэрдэ. Библиотекарь В. В. Копырина киэн туттар биир дойдулаахпыт В.В. Никифоров-Күлүмнүүр төрөөбүтэ 160 сылыгар «Саха саарына» өй-билии күрэҕин ыытта. Күрэх кыайыылааҕынан Т. И. Алексеева тахсан, кинигэ бириис тутта. Салгыы Сэһэргээлэр ырыа, ньургуһун күннэринэн хамаанданан ырыа күрэҕэр, сахалыы остуол оонньууларыгар илин-кэлин түһүстүлэр. Онон түмсүү кыттыылаахтара саҥаны-сонуну билэн, күлэн-үөрэн, сэргэхсийэн тарҕастылар.
