С.С.Васильев – Борогонскай аатынан киин библиотекаҕа «Айылҕа ситимэ» экология киинэ аһылынна. Бүгүн сааскы чаҕылхай ылааҥы күҥҥэ Уус Алдаҥҥа «Айылҕа ситимэ» экология киинэ аһыллар үөрүүлээх түгэнэ тосхойдо. Экология кииннэрэ хас биирдии улууска Ил Дархаммыт Айсен Николаев “Об экологическом благополучии РС(Я) до 2030 г.” дьаһалыгар олоҕуран арыллаллар уонна үлэлэрин сүрүн хайысхатынан нэһилиэнньэҕэ айылҕа, тулалыыр эйгэҕэ харыстабыллаахтык сыһыаннаһар өйү- санааны иитии, күүһүрдүү буолар. Бу үөрүүлээх күҥҥэ Уус Алдан улууһун баһылыгын солбуйааччы Г.Ф.Аргунов, Уус Алданннааҕы судаарыстыбаннай экологическай хонтуруол инспекциятын салайааччыта С.С.Васильев, кииннэммит библиотека тиһигин дириэктэрэ Л.С.Павлова, ойуур хаһаайыстыбатын тэрилтэтин салайааччытын солбуйааччыта Н.Н. До, улуустааҕы юннатскай станция дириэктэрэ Т.Д.Шамаева, «Элгис сүбэ» общественнай түмсүү салайааччыта А.В.Черкашина, тэрилтэ салайааччылара, общественниктар кыттыыны ыллылар, эҕэрдэлэрин эттилэр. Үөрүүлээх күнү силигин ситэрэн Мүрү туһунан кэрэ ырыанан ылбаҕай ырыатынан эҕэрдэлээтэ Аял Вырдылин. Сүрүннээн бу киин дьон өйүн-санаатын экологическай культураҕа, үүнэр көлүөнэ оҕолорго иитэр-үөрэтэр өттүгэр суолталааҕын, айылҕаны харыстыырга, болҕомтолоох буоларга үөрэтэр үлэни тэрийэрин ыйдылар, бэлиэтээтилэр. Бу күн «Айылҕа ситимэ» экология киинэ үлэтин былаана чопчуланан бигэргэннэ, тэрээһин кыттыылаахтара тулалыыр эйгэбитин, айылҕабытын харыстыырга түмсүүлээх үлэ салҕананан бара турдун диэн тэрээһини олохтоох автор Мария Петхуова хоһоонунан түмүктээтилэр. Барҕа баай быйаҥнаах тайҕаны Уйгулаах унаар күөх солкону, Суугунуур күөх солко тыалары, Дьиримнэс уулардаах күөллэри Харыстааҥ, оо дьоннор харыстааҥ Хараххыт харатын кэриэтэ, Ийэ сир бу күндү бэлэҕин – Айылҕа бу кэрэ көстүүтүн.
