Тохсунньу 9 күнүгэр 1930 сыллаахха Дүпсүн, Бороҕон улуустарын уонна Байаҕантай улууһун сорох нэһилиэктэрин холбоһуутун түмүгэр Уус Алдан улууһа үөскээбитэ. Административнай киинэ — Бороҕон. Территорията — 18,3 тыһ.кв. км. Дьокуускай куоракка диэри аллараа суолунан 129 км, салгын суолунан 110 км. Нэһилиэнньэтин ахсаана 22 575 киһи (перепись түмүгүнэн).
Саха сирин Лена, Алдан улахан өрүстэрэ быһа охсуллан ааһаллар, элбэх ааттаах-суоллаах күөллэрдээх, олортон Мүрү, Өнөр, Таргылдьыма саамай улаханнара.
Улуус экономикатыгар сүрүн миэстэни тыа хаһаайыстыбата, сүөһү-сылгы иитиитэ, оҕуруот аһа, бурдук үүннэриитэ ылар.
Суорун Омоллоон аатынан Суоттутааҕы «Доҕордоһуу» музейынан, Россия үтүөлээх образцовай «Кэнчээри» оҕо народнай ансаамбылынан, В.В.Алексеев аатынан Мүрүтээҕи “Уолан” гимназиянан, аар-саарга аатырбыт “Найахы хорунан”, уо.д.а араас эйгэҕэ биллэр-көстөр бас-көс дьонунан аатырар.
Улуус гербэтэ 2004 сыллаахха сэтинньи 19 күнүгэр бигэргэммитэ. Гербэ автора Прокопий Колодезников. Иннокентий Сыроватскай, Василий Парников тылларыгар, Василий Парников мелодиятыгар «Уйгу сирэ-Уус Алдан» Өрөгөй ырыата 2005 сыллаахха бигэргэммитэ.
Улуус дьаһалтатын пресс-сулууспата
