Байаҕантай библиотекатын дьиэтин үөрүүлээх аһыллыыта

Рейтинг:  0 / 5

Звезда не активнаЗвезда не активнаЗвезда не активнаЗвезда не активнаЗвезда не активна
 

Үс Геройдаах Байаҕантай нэһилиэгэр Геройдар сылларынан биллэриллибит 2019 сылы түмүктүүр тэрээһиннэр аастылар. Бу күн Тандаҕа саҥа библиотека дьиэтин үөрүүлээх арыллыыта ааста.

Библиотека - өй-санаа ырайа,

Библиотека – улуу бараммат кылааппыт,

Библиотека – бары норуот киэргэлэ,

Библиотека – барыбыт киэн туттуута.

Байаҕантай нэһилиэгин депутаттарын Мунньаҕынан 2015 сыллаахха ыам ыйын 27 күнүгэр 13№ -дээх уурааҕынан библиотекаҕа советскай-партийнай үлэһит, 1929 сыллаахха «Муҥур Хатыҥ» ТСОЗ тэрийбит, сэрии сылларыгар партия Уус-Майатааҕы райкомун бастакы секретарынан, Кэбээйи оройуоннааҕы Сэбиэтин исполкомун председателинэн, үп салаатын сэбиэдиссэйинэн, Уус-Алдан оройуонугар үлэһиттэр депутаттарын оройуоннааҕы Сэбиэтин исполкомун солбуйар председателинэн салайар үлэҕэ сылдьыбыт Готовцев Роман Власьевич аата иҥэриллибитэ.

Роман Власьевич ыччаттара бу үөрүүллэх тэрээһиҥҥэ кэлэн ыалдьыттаан, олохтоох библиотекаҕа саҥа кинигэлэри бэлэхтээбиттэрэ. Салгыы библиотека дьиэтин-уотун көрөн-истэн баран, саҥа библиотека тутулларыгар үлэтин саҕалаабыттара.

Үөрүүлээх чааһын иилээн-саҕалаан ыыттылар Февронья Гаврильевна Федорова кииннэммит библиотека тиһигин ИМЦ отделын сэбиэдиссэйэ, Туйара Михайловна Окоемова кииннэммит библиотека ИМЦ отделын кылаабынай библиотекаря.

Саха омук үтүө үгэһинэн саҥа дьиэбитин арчылаата Саха Өрөспүүбүлүкэтин культуратын туйгуна Альбина Егоровна Афанасьева!

Саҥа библиотека дьиэтин күлүүһүн туттарда Готовцев Михаил Романович, Российскай Федерация Бочуоттаах тутааччыта, Саха республикатын үтүөлээх тутааччыта, Уус-Алдан улууһун, Мүрү, Хоро нэһилиэгин Бочуоттаах олохтооҕо, күлүүһү туттулар олохтоох библиотекардар Лена Александровна Кудрина уонна Эльвира Юрьевна Егорова.

Библиотека дьиэтин аһар үөрүүлээх түгэҥҥэ аалай лиэнтэни быстылар «Байаҕантай» нэһилиэгин баһылыга Егоров Савва Иванович, саҥа дьиэни биир дойдулаахтарыгар бэлэх ууммут Готовцев Михаил Романович, улуустааҕы культура управлениетын начальнига, улуус мунньаҕын депутата Иннокентий Иннокентьевич Аммосов, библиотека бастыҥ ааҕааччыта - Россия Геройа Михаил Николаевич Готовцев аатынан Танда орто оскуолатын   5 кылааһын үөрэнээччитэ Слепцова Катя.

Салгыы эҕэрдэ тылларын эттилэр Уус-Алдан улууһун аҕа баһылыга Алексей Васильевич Федотов, Байаҕантай нэһилиэгин баһылыга Савва Иванович Егоров, советскай-партийнай үлэһит Роман Власьевич Готовцев ыччаттарын аатыттан тылы эттэ Готовцев Михаил Романович, Улуустааҕы культура управлениетын начальнига Иннокентий Иннокентьевич Аммосов, кииннэммит библиотека тиһигин директора Варвара Николаевна Окоемова уонна араас сылларга библиотекаҕа үлэлээбит коллегаларбыт.

Тупса тур, сайда тур Тандабыт!

Ааҕар дьиэ күлүмнүүр уоттара

Ыҥыра, угуйа сыдьаайдын!

Аҕабыт хаалларбыт кэриэһэ

Ааҕылла, ахтылла туруохтун!

диэн Нина Романовна Байагантай библиотекатыгар Роман Власьевич Готовцев аата иҥэриллэр үөрүүлээх күнүгэр 2015 сыл алтынньы 5 күнүгэр долгуйан туран суруйбут хоһоонун тылларынан библиотека саҥа дьитэтин аһыллыытын үөрүүлээх чааһын түмүктээтибит.