Бороҕоҥҥо пааспары туттарыы «Мин Россия гражданинабын» бырайыак чэрчитинэн 2007 сылтан саҕаланан ыытыллар. Бу бырайыак «Биир ньыгыл Россия»  партия улуустааҕы исполкома, кииннэммит бибилэтиэкэ тиһигэ, «Билии» уопсастыба улуустааҕы салаата уонна федеральнай миграционнай сулууспа улуустааҕы отделын көҕүлээһиннэринэн, үтүө үгэскэ кубулуйан, улууспутугар ыччаты патриотическай тыыҥҥа иитии биир үтүө үгэһэ буолла. 

Туох барыта историяттан саҕаланар. Ол курдук, пааспар историятын туһунан сырдатыыны С.С.Васильев-Борогонскай аатынан киин бибилэтиэкэ ааҕааччыны кытары үлэлиир отделын бибилэтиэкэрэ Тамара Орлова оҥордо. Паспортнай миграционнай сулууспа улуустааҕы отделын исписэлииһэ Саргылаана Олесова Уус Алдан улууһун эдэр олохтоохторугар РФ гражданина буолалларын туоһулуур докумуону — пааспардары үөрүүлээх быһыыга-майгыга туттарда. 

Улуус баһылыга Алексей Федотов  аатыттан эҕэрдэ суруктары «Биир ньыгыл Россия» улуустааҕы исполкомуттан  Анна Федорова тиэртэ.  Улуустааҕы ыччат отделын исписэлииһэ  Василий Бурнашев оҕолорго истиҥ эҕэрдэтин тиэрдэн туран, сэмэй бэлэхтэри туттартаата. 

Долгутуулаах тэрээһини  С.Васильев-Борогонскай аатынан киин бибилэтиэкэ ааҕааччыны кытта үлэҕэ отделын бибилэтиэкэрэ Сардаана Черкашина иилээн-саҕалаан ыытта.

Тэрээһиҥҥэ мустубут ыалдьыттар, оҕолор улаханнык астынан, үөрэн-көтөн тарҕастылар.