Кулун тутар 25-29 күннэригэр Дьокуускайга үс Геройдаах Байаҕантай нэһилиэгин күннэрэ ыытыллар.

Тэрээһини тутуу ырыынагар быыстапкалыыр саалаҕа үөрүүлээхтик саҕалаатылар. Күннэри Тандаттан төрүттээх «Үүнэр көлүөнэ тыйаатырын» артыыһа, Саха Өрөспүүбүлүкэтин туйгуна Юрий Афанасьев алгыс тойугунан арыйда, ыалдьыттарга анаан буруо таһааран арчылаатылар, кымыстаах алаадьынан күндүлээтилэр.

Байаҕантай нэһилиэгин баһылыга Савва Егоров: «Күндү биир дойдулаахтарбыт, эһигини Байаҕантайдар күннэрэ саҕаламмытынан эҕэрдэлиибин. Улууспутугар Геройдар сыллара биллэриллэн, биһиги үс Геройдарбыт – Гаврил Егоров, Владимир Лонгинов, Михаил Готовцев тула түмсэн туһааннаах үлэлэри, дьаһаллары оҥоруохтаахпыт. Инники тэрээһиннэргэ бары көхтөөхтүк кыттаргытыгар эрэнэбин», - диэн эттэ.

Россия үлэҕэ Геройа Михаил Готовцев, Ил Түмэн народнай дьокутаата Геннадий Васильев, Уус Алдан Сэбиэтин бэрэссэдээтэлэ Иван Колодезников бу тэрээһиннэр киэҥ суолталарын, Байаҕантайдар күннэрэ далааһыннаахтык ыытыллалларын бэлиэтээтилэр.

Байаҕантайдар күннэрин маҥнайгы тэрээһининэн «Танда – талааннаахтар түөлбэлэрэ» норуот маастардарын, талба таланнар быыстапкаларынан саҕаланна. Дьокуускайга, Уус Алдаҥҥа, Намҥа, Мэҥэ Хаҥаласка, Тааттаҕа, Горнайга олорор Байаҕантайтан төрүттээх 33 дьон араас оҥоһуктара киэргэттэ. Уус Алдан библиотекатын быыстапката турда. Кинилэр ортолоругар бырааттыы Заболоцкайдар «Оһуор утум» ювелирнай салон, Роман Готовцев – Мындыр Уус, худуоһунньук Семен Корякин о.д.а. Байаҕантай талааннаахтара бэйэлэрин оҥоһуктарын туруордулар.