Россияҕа Аҕа дойдуну көмүскээччилэр, Саха Өрөспүүбүлүкэтигэр Ийэ дойдуну көмүскээччилэр сылларын түмүктүүр үөрүүлээх чааһа В.В. Никифоров — Күлүмнүүр аатынан культура Дыбарыаһыгар ыытылынна. Дыбарыас быыстапкалыыр саалатыгар Сэһэн Ардьакыап аатынан улуус түмэлэ, С.С. Васильев — Борогонскай аатынан улуустааҕы киин библиотека, В.А. Протодьяконов — Кулантай аатынан литературнай түмэл улуус Геройдарыгар анаммыт киэҥ ис хоһоонноох быыстапка туруордулар. Маны сэргэ улуус баһылыгын сүбэһитин Иван Иванович Колодезников көҕүлээһининэн «Россия — моя история» түмэл фондатыттан, Уус Алдан биэс Дьоруойун ааттарынан ааттаммыт алмаастары дьон көрүүтүгэр туруордулар.