Сайт Усть-Алданской МЦБС

Бүгүн, ахсынньы 11 күнүгэр, С.С. Васильев -Борогонскай аатынан улуустааҕы киин библиотека ааҕар саалатыгар Саха Республикатын норуотун хаһаайыстыбатын үтүөлээх үлэһитэ, педагогическай үлэ ветерана, рационализатор, суруйааччы, Уус Алдан улууһун бочуоттаах олохтооҕо Михаил Николаевич Тролуков төрөөбүтэ 100 сылыгар анаан оҕолоро хомуйан таһааттарбыт “Айар – тутар абылаҥ” кинигэ биһирэмэ истиҥник, иһирэхтик буолан ааста.

: Опубликовано: 11 декабря 2024; Просмотров: 207

Подробнее...

Ахсынньы 10 күнүгэр Мүрү 1 №-дээх орто оскуолатын 7 “б” кылаас үөрэнээччилэригэр сүрдээх интэриэһинэй тэрээһин буолан ааста. Федора Дмитриевна Бурнашева кылаас салайааччытын быһыытынан ситимнээх үлэтин чэрчитинэн, “Мин дьиэ кэргэним – мин тирэҕим” диэн кылаас чааһа ыытылынна.

Бу тэрээһиҥҥэ уопсайа 16 дьиэ кэргэн кытынна. Кыттааччылар “Айар” кинигэ кыһата таһаарбыт “Төрүччү” ыйынньыгар бэйэлэрин төрүччүлэрин оҥорон аҕалан кэпсээтилэр. Оҕолор бэйэлэрин өбүгэлэрин олорон ааспыт олохторун чинчийэн, үөрэтэн, саҥаттан саҥаны билбиттэрин салҕыы үөрэтэр баҕа санаалаахтарын иһитиннэрдилэр. Манна бааллар эбит: Сергей Афанасьевич Зверев -Кыыл Уола, Старостин Анатолий Гаврилович – Сиэн Кынат, Алексеев Роман Петрович –Бөҕө Арамаан курдук биллиилээх дьон ыччаттара. Бааллар эбит учууталлар, милииссийэлэр сыдьааннара.

Дьүүллүүр сүбэҕэ үлэлээбит улуустааҕы киин бибилэтиэкэ электроннай салаатын иһитиннэрии уонна быраап боппуруостарыгар специалиһа Майя Оллонова Киин библиотекабыт ситимигэр “Олох ытык маһа” (Древо Жизни) диэн анал лицензированнай программа үлэлиирин уонна бу программаҕа, аныгы олох чэрчитинэн, бэйэ төрүччүтүн ыйынньыгын тутан таһаарыахха сөбүн туһунан уонна төрүччүнү оҥорууга туһалаах сүбэлэри биэрдэ: «Сахалар бэрт былыргыттан билсэллэригэр кимтэн кииннээххин, хантан хааннааххын диэн ыйыталлара. Бу кинилэр өбүгэлэрин ытыктыылларын, умнубаттарын, удьуордааһыҥҥа улахан болҕомтону ууралларын туоһута. Аныгы үйэҕэ араас технологиялары туһанан, архыыптарга үлэлээн, саастаах аймах дьонтон ахтыыларын хомуйан, дьиэ кэргэн төрүччүтүн оҥоруу кэскиллээх үлэ буолар. Саҕалаабыт үлэҕит салгыы сайдарыгар баҕарабын», – диэн этиитин түмүктээтэ, салаа үлэтин туһаналларыгар ыҥырда.

Былыргы өттүгэр биһиги өбүгэлэрбит тоҕус көлүөнэҕэ диэри урууну-аймаҕы үөрэтэн билэллэрэ. Кинилэр удьуордааһын, хаан уруу аймахтаһыы оруолун күүһүгэр итэҕэйэллэрэ, болҕомтолорун уураллара. Дириҥ силистээх мас бигэ тирэхтээх буолар. Киһиэхэ эмиэ оннук. Төрдүн ууһун билэр, удьуорун утумун салҕыыр киһи олоҕор сөптөөх суолу тутуһарыгар бигэ тирэхтээх буолар диэн өйдүүллэрэ. Онон оҕолорбутугар төрүччү суолтатын өйдөтөр үлэлэр, маннык тэрээһиннэр ыытыллаллара кэскиллээх үлэ буолар. Оҕо төрөөбүт дойдутугар бэриниилээх буола улаатыыта, бастатан бэйэтин дьиэ кэргэнин, төрдүн-ууһун билиититтэн саҕаланар.