Олунньу 11 күнүгэр улуустааҕы киин библиотекаҕа “Сырдыгы, сылааһы саҕааччылар” диэн Уус Алдан улууһугар бастакы электричество уота кэлбитэ 90, оройуоннааҕы электрическэй ситим (РЭС) тэриллибитэ 45 сылыгар аналлаах кинигэ биһирэмэ буолла.
Тэрээһиҥҥэ улууска электричество уота кэлиитин историятын уонна биир дойдулаахтарбыт
быһаччы кыттыыларын туһунан Сэһэн Ардьакыап аатынан улуустааҕы историяны, кыраайы үөрэтэр түмэл сотруднига Александр Петрович Сивцев билиһиннэрдэ.
Кинигэни хомуйан оҥордулар: Василий Михайлович Прокопьев, Наталья Ивановна Константинова, Михаил Афанасьевич Куличкин, Николай Петрович Алексеев. Кинигэ Дьокуускайга 2025 сыллаахха “Кэм” кинигэ кыһатыгар 150 ахсаанынан бэчээттэнэн таҕыста. Кинигэҕэ уот ситимин эйгэтин араас сылларга үлэлээн ааспыт ветераннарын, үлэһиттэрин үлэлэрин-хамнастарын көрдөрөр ахтыылар киирбиттэр. Кинигэ улуус баһылыга Василий Петрович Алексеев, Киин электрическэй ситим салайааччыта Петр Гаврильевич Иванов киирии тылларыттан саҕаланар. Саха сиригэр уонна улууспутугар электричество кэлиитин, историятын кэпсиир архыып докумуоннара киирбиттэрэ кинигэни дириҥ ис хоһооннуур.
Халыҥ тастаах, үрдүк хаачыстыбалаах кумааҕыга бэчээттэммит, элбэх өҥнөөх хаартыскалар ситэрэн-хоторон биэрэллэр. Кинигэ ааҕааччы киэҥ араҥатыгар анаммыт.
Уус Алдан улууһун аҕа баһылыга Василий Петрович Алексеев, Мүрү, Бэрт-Ууһун, Байаҕантай нэһилиэктэрин баһылыктара, “Якутскэнерго” киин электрическэй ситимнэрин салайааччыта Петр Гаврильевич Иванов, Бороҕоннооҕу РЭС бастакы начальнигынан үлэлээбит Тян Олег Николаевич, үлэ бэтэрээннэрэ бэйэлэрин ахтыыларын оҥордулар, эҕэрдэлэрин тиэртилэр.
Хас биирдии дьиэҕэ уоту тиэрдии, саахалы туоратыы, өрөмүөннээһин, уот остуолбатын тутуу – үгүс сыраны-сылбаны, күүһү-күдэҕи эрэйэр үлэ. Сыралаах, таһаарыылаах үлэҕит сурукка тиһиллэн кинигэ буолан тахсан үйэтийбитинэн өссө төгүл эҕэрдэлиибит! Инникитин да дьону-сэргэни саахала, быыстала суох сырдыгынан хааччыйа турун диэн баҕа санаабытын тиэрдэбит!
