Эргиччи дьоҕурдаах үтүө-кэрэ дьонтон биирдэстэрэ Иван Васильевич Мигалкин – Кэрэл буолар. Кини дэгиттэр талаанын бар дьонугар бэлэх ууммута, бары күүһүн-кыаҕын, сыратын-харатын саха дьоно омук быһыытынан чэлгийэригэр ууран туран айбыта-туппута.
      Тохсунньу 23 күнүгэр, Национальнай бибилэтиэкэ историческай саалатыгар норуот бэйиэтэ Иван Мигалкин туһунан «Бар дьоҥҥо истиҥ тапталынан» кинигэни бииргэ үлэлээбит, айбыт-туппут дьоно-сэргэтэ, аймахтара, доҕотторо мустан сүрэхтээтилэр. Истиҥ, ол эрэн курус киэһэ Иван Васильевиһы ахтан-санаан аастылар.
Ол курдук, Уус Алдан улууһун баһылыга Василий Петрович Алексеев, Саха сирин суруйааччыларын сойууһун бэрэссэдээтэлэ Наталья Харлампьева, «Айар» национальнай кыһа салайааччыта Август Егоров, СӨ үтүөлээх артыыстара Анатолий Бурнашев, Варя Аманатова уо.д.а. кыттыыны ыллылар. «Мичээр» уһуйаан кырачаан иитиллээччилэрэ, «Кэскил» медиакиин юнкордара Иван Мигалкин хоһооннорун толордулар. Киэһэни «Саха суруйааччылара» ассоциация бэрэссэдээтэлэ Олег Сидоров иилээн-саҕалаан ыытта.
Иван Мигалкин биһиги кыһабыт эрэдээктэрдэрин, салалтаны кытта ыкса үлэлээбит суруйааччы буолар. Уопсайа бу сыллар тухары 50-тан тахса кинигэ 180 тыһыынча ахсаанынан бэчээттэнэн тахсыбыта. Иван Васильевич поэзия алыбыгар кыра сааһыттан ылларбыт. Үһүс кылааска үөрэнэр кэмигэр маҥнайгы хоһоонноро «Бэлэм буол» хаһыакка бэчээттэммиттэр, 14-17 саастааҕар суруйбут «Мүрүбэр», «Ырыам», «Көрөбүн мин», «Долгун арҕастара», «Сахам хомуһа» уо.д.а. хоһоонноро кини лирическэй талаанын төрөөбүт дойдутугар тапталын кытта араарбакка дьүөрэлиирин көрдөрөллөр.
«Иван Васильевич олус үтүө, махталлаах киһи этэ. “Эһиги, кыһа үлэһиттэрэ, мин норуот бэйиэтэ буоларбар көмөлөөххүт, махталым муҥура суох” диирэ. Бииргэ үлэлээбит кэммитигэр олус элбэхтэ бииргэ командировкаҕа сылдьан, өрөспүүбүлүкэ улуустарынан да, Россияҕа, Россия да таһыгар айанныырбыт. Кини олус үчүгэй кэпсээнньит буолара, массыынаҕа олоро түстэ эрэ, киһи эрэ истэ олоруох сэһэргиирэ, билэрэ-көрөрө да элбэҕэ. Эйэҕэс-сайаҕас буолан ханна да тиийдэҕинэ дьону-сэргэни кытта билсэн, билэр дьонун, аймахтарын да булан үөрэрэ-көтөрө. Бу кинигэ талааннаах суруйааччыбыт туһунан үтүө өйдөбүнньүк буолар», – диэн Август Васильевич үллэһиннэ.