Бүгүн, тохсунньу 23 күнүгэр, Мүрү нэһилиэгэ 2025 сылы түмүктүүр үөрүүлээх тэрээһинин чэрчитинэн төрөөбүт түөлбэбит 65 сыллаах үбүлүөйүгэр анаммыт «Мүрү нэһилиэгин уулуссалара» онлайн –күрэх түмүгэ таҕыста. Күрэҕи Мүрү нэһилиэгин дьаһалтата уонна С.С. Васильев-Борогонскай аатынан киин библиотека уулуссалар историятын, ааттара иҥэриллибит бастыҥ дьоммут олохторун, үлэлэрин, Саха Сирин, улуус, нэһилиэк сайдыытыгар киллэрбит кылааттарын билиһиннэрэр, тарҕатар сыаллаах -соруктаах тэрийдилэр.

           Күрэх кыттыылаахтара айымньылаах уонна аныгы технологиянан туһанан медиапрезентация быһыытынан киллэрбит үлэлэрин Айгуль Абдибакировна Борисова, нэһилиэк сири-уоту кытта үлэлиир исписэлииһэ, Юлия Ивановна Афанасьева, Сэһэн Ардьакыап аатынан улуустааҕы кыраайы үөрэтэр түмэл сүрүннүүр исписэлииһэ уонна Надежда Васильевна Гоголева, Оҕо библиотекатын сүрүннүүр библиотекара сыаналаатылар.

            Дьүүллүүр сүбэ быһаарыытынан күрэххэ кыайыылаахтарынан буоллулар:

 I миэстэ - Оллонов Коля, Г.В. Егоров аатынан Мүрү 1№-дээх оскуолатын 10  «а»  кылааһын үөрэнээччитэ, «Үс сэрии кыттыылааҕа, гвардия майора Дмитрий Данилович Оллонов аатынан уулусса» үлэтинэн;

II миэстэ - Макеева Вика, Мүрү 2№-дээх орто оскуолатын 9 «б» кылааһын үөрэнээччитэ, «Төрөөбүт дойду төрөөбүт уулуссаттан саҕаланар» (Степан Степанович Аржаков аатынан уулусса) үлэтинэн;

III миэстэ - Портнягина Даша, Мүрү 2 №-дээх орто оскуолатын 10 «б» кылааһын үөрэнээччитэ, «Мындааба бөһүөлэгин уулуссата - Иван Дмитриевич Замятин аатынан».

«Түмсүүлээх үлэнэн» номинацияны Н.Н. Окоемов аатынан уулусса туһунан үлэтинэн «Мичил» оҕо уһуйаанын коллектива ылла. Бары күрэххэ кыттыбыт биир дойдулаахтарбытыгар махтанабыт уонна кыайыылаахтары итиитик-истиҥник эҕэрдэлиибит!