Бүгүн, Ахсынньы 19 күнүгэр, Уус Алдан улууһун, Бороҕон сэлиэнньэтигэр “Олоҥхо Дьиэтэ” этнокультурнай киин баараҕай саалатыгар,
"ИЙЭ ТЫЛ, ТӨРҮТ ДЬАРЫК ИЛГЭЛЭЭХ ТҮҺҮЛГЭТЭ" форум чэрчитинэн "ИЙЭ ТЫЛ ИЛГЭТЭ" Р.П. Алексеев – Бөҕө Арамаан төрөөбүтэ 125 сылын түмүктүүр тэрээһин ыытылынна.
Бу күн саха норуотун дьонугар-сэргэтигэр аналлаах, улахан суолталаах саха тылын баайын, күүһүн, харыстааһын уонна сайыннарыы, үйэтитэр уонна кэнчээри ыччаттытыгар тиэрдэр үтүө соруктаах кэскиллээх көрсүһүү буолла.
Тэрийээччилэр тоҕуоруһа мустубут ыалдьыттары, саха сиэринэн алгыстаах алаадьынан айах тутан көрүстүлэр.
Киин бибилэтиэкэ туруорбут «ОЛОҤХО БИҺИГЭ - УУС АЛДАН" диэн улуус одонхоһуттарыгар аналлаах, дириҥ ис-хоһоонноох, улуус историятын көрдөрөр быыстапкалара көрөөччү болҕомтотун тарта.
"ИЙЭ ТЫЛ ИЛГЭТЭ" тэрээһин үөрүүлээх аһыллыытыгар, киирии тыл кэнниттэн, Роман Петрович Алексеев - Бөҕө Арамаана үс үйэлээх "Алаатыыр Ала туйгун" олоҥхотуттан быһа тардыыны Павел Аммосов, Алена Давыдова толорон, Киин бибилэтиэкэ үлэһиттэрэ Бөҕө Арамаана "Сылдьыбыт сырыыларым, истибит чахчыларым", "Олоҥхоһут чабырҕахтара, ырыалара", "Күүстээхтэр уонна быһыйдар" диэн кинигэлэрин билиһиннэрэн көрөөччүлэр сүргэлэри көтөхтө. “Тыый, Чабырҕах!” телебырайыак финалиһа Лариса Ордахова сытыы-тыллаах, көрдөөх-нардаах чабырҕаҕынан тэрээһини киэргэттэ.
Саха тылын уонна литературатын учууталларын III сийиэһин, Саха сирин библиотекардарын I сийиэһин түмүгүнэн саха тылын сайыннарыыга, аныгы үйэҕэ саха тылын эйгэтин кэҥэтиигэ соруктары ылыныыга аналлаах суолталаах этиилэр түмүктэрин, соруктарын Наталья Васильевна Бурцева, Лена Семеновна Павлова уонна Маргарита Ивановна Крылова саха тылын харыстааһын, үйэтитии, сайыннарыы туһунан билиһиннэрдилэр.
СӨ бырабыытылыстыбатын бэрэссэдээтэлин солбуйааччыта Сергей Васильевич Местников, СӨ Ил Түмэн бэрэссэдээтэлин солбуйааччыта, СӨ Ил Дарханын иһинэн “Олоҥхо” национальнай тэрийэр кэмитиэт бэрэссэдээтэлэ Александр Николаевич Жирков, Олоҥхо Ассоциациятын президена Февронья Васильевна Шишигина, Олоҥхо институтун директора Анисимов Руслан Николаевич, Уус Алдан улууһун баһылыга Василий Петрович Алексеев, Уус-Алдан улууһун социальнай борруруостарга баһылык солбуйааччыта, улуустааҕы Олоҥхо Ассоциациятын бэрэссэдээтэлэ Григорий Федорович Аргунов кэлэн дьоһун тылларын этэн, араас таһымнаах наҕараадалары туттаран, тэрээһин суолтатын үрдэттилэр.
Олоҥхо тыйаатырын артыыһа Яна Нюргусова олоҥхоһут Андрей Гаврильевич Местников "БАРДАМ БААБЫЙ" олоҥхотун тыыннаах толоруута – бу тэрээһин үрдүк чыпчаала буолла.
Эбиэттэн киэһээ, “Дүпсүн улууһугар олорбут политсыылынай Николай Павлович Странден сыдьааннара” документальнай киинэ сүрэхтэниитэ буолла, дьон-сэргэ санаатын түмтэ. Киинэ үлэтин туһунан киинэ ааптара, П.А. Ойуунускай аатынан судаарыстыбыннай бириэмийэ лауреата Евдокия Игнатьевна Избекова билиһиннэрдэ.
Тэрээһин түмүгүнэн Окоемова Варвара Николаевна, Пермякова Августина Петровна, Сивцева Мария Захаровна, Троева Вера Иннокентьевна, Алексеева Татьяна Ильинична, Аргунов Айаал Гаврильевич санааларын эттилэр.
