Ахсынньы 6 к., улуустааҕы киин библиотека ааҕар залыгар "Түмэр, көҕүлүүр киһибит этэ..." диэн СР культуратын туйгуна, өр сылларга улуус культуратын тэрилтэлэригэр үтүө суобастаахтык үлэлээн ааспыт Гаврил Егорович Петуховка аналлаах кинигэ билиһиннэриитэ буолла.

Толору киһилээх залга Дьокуускай куораттан, Лөгөй сириттэн, улуус кииниттэн мустан кэлбит Гаврил Егорович бииргэ төрөөбүттэрэ, аймахтара, табаарыстара, биир идэлээхтэрэ, ыҥырыылаах ыалдьыттарбыт Арктикатааҕы эпос уонна искусство кииниттэн, СӨ култууратын үтүөлээх үлэһитэ Адамова Саргылана Саввична, СӨ култуураҕа уонна духуобунай сайдыыга министерствотыттан Готовцева Анна Степановна кини туһунан истиҥник санаан-ахтан аастылар.

Дьокуускай куоракка Дани-Алмаска 100 ахсаанынан тахсыбыт кинигэҕэ 56 ахтыы киирбит. Ахтыылар бииртэн биир солбуйса, бэйэ-бэйэлэрин ситэрсэн биэрэ, хаартыскаларынан киэргэтиллэн киирбиттэр. Кинигэни СР культуратын үтүөлээх үлэһитэ, культура ветерана М.З. Сивцева С.А. Бурцевалыын хомуйан таһаарбыттар. Кинигэ киирии тылыгар Мария Захаровна:"Орто дойдуга киһи буолан айыллан кэлбит барыта алтыспыт дьонугар туох-ханнык өйдөбүлү хаалларбытынан сыаналанар, үйэлэргэ умнуллубаттык хатанар",-диэн суруйар. Кырдьыга да оннук, Гаврил Егорович биһиги өйбүтүгэр-санаабытыгар барыбытыгар культура эрэллээх байыаһын быһыытынан хаалыа. Гаврил Егорович Петухов туһунан кинигэ кимиэхэ эрэ суолдьут сулус, кимиэхэ эрэ ааспат, арахпат үтүө өйдөбүл буолуо.

Ольга Павлова, С.С.Васильев-Борогонскай аат. киин библиотека отделын сэбиэдиссэйэ.