Сэтинньи 25 күнүгэр С.С.Васильев -Борогонскай аатынан киин бибилэтиэкэ ааҕар саалыгар үгэскэ кубулуйбут "Олоҥхо дьыктаана" аахсыйа ыытылынна.  Аахсыйа сыала сахалыы таба суруйуу үөрүйэҕин сайыннарыы уонна олоҥхо баай тылынан-өһүнэн билиини-көрүүнү кэҥэтии буолар.

Быйыл барыта араас эйгэҕэ үлэлиир 23 улууспут олохтооҕо кэлэн кыттыыны ыллылар уонна И.И.Бурнашев -Тоҥ Суорун "Сылгы уола Дыырай бухатыыр" олоҥхоттон "Сир -ийэ дойду айыллыыта" түһүмэхтэн быһа тардыыны суруйдулар. Быйылгы дьыктаан тексигэр олоҥхоһут бэйэтэ хайдах толорон саҥарбытынан киирбит тыллар бааллара уратылаах буолла.

Кыттааччылар суруллубут үлэлэрэ бэрэбиэркэлэнэр, түмүк тахсарын кэтэһэр кэмнэригэр "Олоҥхо биһигэ -Уус Алдан" быыстапка туһунан "Алгыс" кыраайы үөрэтэр салаа сэбиэдиссэйэ Ольга Николаевна Павлова бэсиэдэтин иһиттилэр, салҕыы саха тылын сайыннарар араас остуол оонньуутугар күрэхтэһэн сэргэхсийэн ыллылар.

Түмүккэ "Бастыҥтан бастыҥ суруйааччы" аатын Елизавета Алексеевна Дьячковская, бастыҥ суруйааччылар Елизавета Николаевна Данилова, Сардана Романовна Бочкарева буоллулар.