Сэтинньи 25 күнүгэр С.С.Васильев – Борогонскай аатынан киин библиотекаҕа "Сардаҥа" эдэр кэрэспэдьиэннэр кулууптара сүрэхтэннэ. Бу Г.В.Егоров аатынан Мүрү 1№ орто оскуолатын, улууспут "Мүрү саһарҕата" хаһыат, киин библиотека холбоһуктаах бырайыактара.

Сахалар хас биирдии тыл суолтатын билэн баран тутталлара. Эдэр кэрэспэдьиэннэр сырдык сардаҥа буолан суруналыыстыка эйгэтигэр сандаарыччы тыган, саха тылын нөҥүө өйү-санааны сааһылаан чочуллан тахсалларыгар  сылы эргиччи үлэ ыытыллыаҕа. Бүгүн библиотека методическэй отделын салайааччыта Феврония Гаврильевна Федорова оҕолорго хас биирдиилэригэр анал удостоверение туттаран эҕэрдэлээтэ, "Мүрү саһарҕата" хаһыат кэрэспэдьиэнэ Афанасий Сектяев бэйэтин идэтин туһунан сэһэргээтэ, салҕыы Ольга Николаевна Павлова тылдьыттары кытта үлэҕэ, Мария Петровна Заболоцкая олоҥхо тиэмэтигэр саха тылын суолтатыгар практическай дьарык ыыттыллар. Эдэр кэрэспэдьиэннэр салайааччылара Мария Андреевна Аммосова үлэ сонун хайысхалаахтык ыытылларыгар санааларын үллэһиннэ.