Эрчимнээх комсомол саастарбын

Эргиллэн далбаатаан ылыахпын

Эргийбэт ыраахха хаалбыккыт,

Эдэркээн саастарым ааспыккыт.

Бааллара ол онно күүрээннээх,

Омуннаах мунньахтыыр киэһэлэр,

Күргүөмнээх субуотунньук күннэрэ,

Ленинскэй зачеттар, отчуоттар.

 Мөлүйүөнүнэн сэбиэскэй ыччат үлэҕэ, үөрэххэ буһуу-хатыы оскуолатынан буолбут, үүнэр сүһүөх ыччаты Ийэ дойдуга муҥура суох итии таптал, бэриниилээх буолуу тыыныгар ииппит ЫЧЧАТ БҮТҮН СОЙУУСТААҔЫ ЛЕНИНСКЭЙ КОММУНИСТИЧЕСКАЙ СОЙУУҺА 1918 сыл алтынньы 29 күнүгэр тэриллибитэ.

Комсомол иҥэрбит үйэлээх сыаннастарын – төрөөбүт дойдуга тапталы, ытык иэһи, үлэһит буолууну, бэриниилээх буолууну бэйэлэрин өйдөрүгэр-санааларыгар илдьэ сылдьар комсомол ииппит дьоно күн да бүгүн ыччакка бэйэҕит олоххутунан бастыҥ холобур буола сылдьаҕыт.

Күндү ааҕааччыларбытын С.С.Васильев-Борогонскай аатынан киин библиотека ааҕар саалатыгар турбут быыстапканы кэлэн көрөн, эдэр комсомол саастаргытын ахтан-санаан ааһаргытыгар ыҥырабыт!