Алтынньы 22 күнүгэр Сергей Степанович Васильев – Борогонскай аатынан улуустааҕы киин библиотека уонна улуустааҕы көрбөттөр уопсастыбалара  харахтарынан мөлтөхтүк көрөр уонна көрбөт дьоҥҥо анаан “Үрүҥ торуоска” аахсыйа чэрчитинэн “Үтүө санаа ыллыктара” тэрээһини ыыттылар.

Тэрээһин киин библиотека ааҕар саалатыгар төгүрүк остуолтан саҕаланна. Манна пенсионнай, социальнай сулууспаттан, спорт салаатыттан сокуоҥҥа саҥа уларыйыылар туһунан иһитиннэриилэри оҥордулар уонна араас хабааннаах боппуруостарга хоруйдаатылар.

Бу күн библиотека “Дьиэ кэргэн” национальнай бырайыагынан ылбыт электроннай лупалара сүрэхтэннэ. Мөлтөхтүк көрөр дьоҥҥо туһааннаах олус наадалаах лупаны кэлбит ыалдьыттар сэргээтилэр, кинигэни, хаһыаты ааҕарга табыгастааҕын биһирээтилэр.

Көрбөттөр уопсастыбаларын бэрэссэдээтэлэ Аммосов Д.В. ааспыт сайын биһиги улууспутугар ыытыллыбыт илин эҥэрдээҕи “Современная северная мозаика” бэстибээл, уопсай ситиһиилэр туһунан кэпсээтэ. Басыгысова И.К., Гоголева В.М., Попова Е.Ф. дьиэҕэ олорор киһи илиититтэн саҕалаан араас хамсаныылары оҥорон доруобуйаларын тупсаралларыгар көрдөрөр-иһитиннэрэр сүбэлэри биэрдилэр, оонньоттулар. Уопсастыба биир актыыбынай чилиэнэ Степанова А.Е. бэйэтин дьарыгын, талаанын туһунан сэһэргээтэ, айан таһаарбыт хоһооннорун, ырыаларын хомуурунньуктарын көрдөрдө.

Салгыы кэлбит ыалдьыттар итии чээй иһэн, ирэ-хоро кэпсэтэн, сэһэргэһэн, оонньоон-көрүлээн сэргэхсийдилэр. Ол курдук “Эрудиты” биктэриинэҕэ, “Угадай мелодию”, “Игра на ощупь”, мээчиги сыалга быраҕыы, катамино күрэхтэргэ бары оонньоотулар, грамотанан уонна бирииһинэн наҕараадаланнылар.

Общество чилиэннэрэ тэрийээччилэргэ олус махтанан, үтүө баҕа санааларын этэн өссө да кэлиэх буолан тарҕастылар.

Үтүө сырдык санаа, сыһыан киһи олоҕор олус күндү, күүскэр күүһү, эрэли эбэр, инники олоххо суолдьут сулус буолар. Ханна да, хайдах да кэмҥэ бэйэ - бэйэбитигэр харыстабыллаахтык сыһыаннаһыахха, үтүөнү баҕарыахха, эйэлээх буолуохха.

Татьяна Бурцева, бибилэтиэкэр.