Бороҕоҥҥо, атырдьах ыйын 24 күнүгэр,  Бүтүн Россия бочуоттаах, СӨ үтүөлээх тутааччыта, СӨ суолун хаһаайыстыбатын бочуоттаах үлэһитэ, Уус Алдан улууһун , Мүрү, Хоро, Байаҕантай нэһилиэктэрин бочуоттаах олохтооҕо, библиотека дьыалатыгар Саха Өрөспүүбүлүкэтин Ил Дарханын И.И. Крафт аатынан бириэмийэтин лауреата, меценат Михаил Романович Готовцевка анаммыт Аҕа – тутааччы скверин үөрүүлээхтик арыйыы сиэрэ- туома ыытылынна. Кэлэр кэнчээри ыччакка үтүө өйдөбүнньүк буолар пааматынньык ааптардарынан скульптордар Владислав Александрович Бурцев, Владимир Степанович Левин, Петр Иннокентьевич Эляков буоллулар. Сквери Михаил Романович кэргэнэ Россия уопсай үөрэхтээһинин бочуоттаах үлэһитэ, Уус Алдан улууһун, Мүрү нэһилиэгин бочуоттаах олохтооҕо Полина Ивановна уонна оҕолоро, сиэннэрэ көҕүлээн туттардылар.

         Үөрүүлээх тэрээһиҥҥэ Михаил Романович аймах-билэ дьоно, доҕотторо,  Егор Егорович Ефимов, СӨ массыына-суоллааһын управлениетын генеральнай директорын солбуйааччы, Виктор Рудольфович Шнайдер, «Дороги - Саха» тэрилтэ генеральнай директорын солбуйааччы, Уус-Алдан улууһун баһылыгын солбуйааччы Анатолий Дмитриевич Сторожев, Мүрү нэһилиэгин баһылыга Прокопий Федотович Румянцев, Байаҕантай нэһилиэгин баһылыга Савва Иванович Егоров, Мүрү нэһилиэгин олохтоохторо кыттыыны ыллылар. Алгыс туомун алгысчыт Айаал Аргунов оҥордо. Тэрээһини С.С. Васильев аатынан киин библиотека ааҕааччыны кытта үлэҕэ сүрүннүүр библиотекара Сардана Михайловна Черкашина иилээн-саҕалаан ыытта.