Муус устар 9 күнүгэр С.С . Васильев – Борогонскай аатынан улуустааҕы киин библиотекаааҕар саалатыгар икки кинигэ сүрэхтэннэ. “Үтүө дьон аата үйэлэри уҥуордуо” диэн ааттаах выставка туруоруллан, дьон сэҥээриитин ылла. Тэрээһини Уһун Күөл библиотекара Марияна Николаевна Алексеева ыытта, кинигэлэри “Алгыс” кыраайы үөрэтэр салаа сэбиэдиссэйэ Ольга Николаевна Павлова ырытта.
Бу күн Российскай Федерация уонна Саха Өрөспүүбүлүкэтин агропромышленнай комплексын бочуоттаах үлэһитэ,
Российскай Федерация "Партийнай килбиэн иһин" орден кавалера, Саха Өрөспүүбүлүкэтин норуотун хаһаайыстыбатын үтүөлээх үлэһитэ, Саха сирин тыатын хаһаайыстыбатын уонна уутун хаһаайыстыбатын туйгуна, Мүрү, I-Өспөх, Баатаҕай нэһилиэктэрин, Уус-Алдан улууһун Бочуоттаах олохтооҕо, Саха сирин идэлээх сойууһун хамсааһынын сайдыытыгар, Саха Өрөспүүбүлүкэтин бүттүүн норуот үтүө дьыала хамсааһынын олоххо киллэриигэ, Саха Өрөспүүбүлүкэтигэр физическэй култуура уонна спорт сайдыытыгар, Уус-Алдан улууһун үөрэҕириитин, култууратын сайдыытыгар киллэрбит кылаатын иһин онтон да атын араас наҕараадалар, мэдээллэр хаһаайыннара, Саха Өрөспүүбүлүкэтин буулдьанан ытыы спордун I-категориялаах судьуйата, үлэ, спорт, мелиорация ветерана, улуус мунньаҕын хас да төгүллээх дьокутаата, өр сылларга тыа хаһаайыстыбатын министерствотын мелиорацияҕа уонна тыа сирин уунан хааччыйар управлениятын Мүрүтээҕи филиалын тэрийэн, салайан үлэлэппит, улууспут, Өрөспүүбүлүкэбит биир улахан баай уопуттаах мелиоратора, дьон-норуот туһугар үлэлээбит, дьоҥҥо-сэргэҕэ дириҥник убаастанар салайааччы Оллонов Николай Николаевич туһунан ахтан-санаан улууспут бары нэһилиэктэрин баһылыктара, тэрилтэлэрин салайааччылара, дьокутааттара, Н.Н. Оллонов аатынан Уһун-Күөл орто оскуолатын үөрэнээчилэрэ, чугас аймахтара, бииргэ төрөөбүттэрэ, дьиэ кэргэнэ, онтон да атын үгүс дьон муһунна.
Бастакы “Дьон туһугар олорбуттара” кинигэни Николай Николаевич , Любовь Николаевна уонна Майя Николаевна Оллоновтар хомуйан оҥорбуттар. Бу кинигэҕэ Улуу Кыайыы 80 сылын көрсө Аҕа дойду Улуу Сэриитин кыттыылааҕа үлэ бэтэрээнэ, салайар үлэҕэ үлэлээбит, Николай Иванович уонна бастакы тырахтарыыс кыргыттартан биирдэстэрэ, тыыл, үлэ бэтэрээнэ Дария Тихоновна ололохторун сырдатар ахтыылар киирбиттэр.
Иккис кинигэ Н.Н. Оллонов төрөөбүтэ 75 сылыгар анаан “Саха Сирин үтүөкэн дьоно” серияҕа, "Алаас" кинигэ кыһатыгар бэчээттэннэ. Кинигэни кийиитэ Майя Николаевна Оллонова, кэргэнэ Анна Ивановна Оллонова, балтылара Любовь Николаевна Оллонова уонна Бурнашева (Оллонова) Саргылана Николаевна хомуйан оҥордубуттар.
Бэлиэтээн эттэххэ, Николай Николаевич үлэлиир сылларыгар улууһун дьонун сэргэтин туһугар араас элбэх үлэлэри ыыппыта, “Лена-Мүрү” иһэр уу ситимин баараҕай тутуутун салайан үлэҕэ киллэрбитэ, I-Өспөх туспа нэһилиэк буолуутун, Уһун Күөл оскуолатын 11 кылаастаах орто оскуола буолуутун ситиспитэ, Уһун Күөлгэ, Суоттуга Кыайыы болуоссаттарын туппута, Уус Алдан улууһугар ытыы федерациятын тэрийбитэ отон да үгүс үйэлээх үлэлэри ыыппыта.
Ол да иһин, нэһилиэгин дьоно туруорсан 2024 сыллаахха Уһун-Күөл орто оскуолатыгар Н.Н. Оллонов аата иҥэриллэн, олохтоохтор үөрүүлэрэ үгүс.
