Муус устар ый 3 күнэ - СР норуотун хаһаайыстыбатын үтүөлээх үлэһитэ, Горнай, Уус Алдан улуустарын бочуоттаах олохтооҕо, СР Ытык кырдьаҕастарын Үрдүкү сэбиэтин чилиэнэ БОЧКАРЕВ ИННОКЕНТИЙ ВАСИЛЬЕВИЧ 75 сааһын үбүлүөйдүүр дьоро күнэ!
Үлэттэн дьолломмут ытыктабыллаах Иннокентий Васильевич! 75 сааскын томточчу туолбут үөрүүлээх күҥҥүнэн, эйиигинэн биир дойдулаахтарын киэн туттан, ис сүрэхтэн истиҥник эҕэрдэлиибит! Эйиэхэ бүгүҥҥү күҥҥэ махтал маанытын, эҕэрдэ эриэккэһин аныыбыт! Үлэҕин-хамнаскын биһириибит, ситиһиилэргин кэрэхсиибит, аламаҕай, элэккэй бэйэҕин сэргиибит! Бэлиэ дьону кытта эҥэрдэспит, ааттаах дьону кытта алтыспыт, дьоһуннаах олоххун уруйдуубут, алгыстаах аартыккын айхаллыыбыт!
Бу бэлиэ күн, В.В. Никифоров аатынан “Тойон Мүрү” культура киинигэр “Тыа сирин сайдыытын туһугар” диэн дириҥ ис хоһоонноох, И.В. Бочкарев олоҕун, таһаарыылаах үлэтин сырдатар киин библиотека быыстапкатын билсэргитигэр ыҥырабыт. Ону тэҥэ, улуус электроннай библиотекатын фондатын матырыйаалларын киирэн көрүҥ, ааҕыҥ, билсиҥ!
