Кулун тутар  27 күнүгэр Тулунаҕа экономическэй наука кандидата, Саха Республикатын норуотун хаһаайыстыбатын үтүөлээх үлэһитэ, Ил Түмэн 4 - с уонна 5-с ыҥырыылаах Мунньаҕын депутата, СР тыатын хаһаайыстыбатын туйгуна, СР атыы – эргиэн эйгэтин туйгуна, биллэр урбаанньыт, хайыһарга ССРС спордун маастарыгар кандидат, Саха Республикатын спордун маастара, Россия хайыһарга спордун федерациятын чилиэнэ, СР хайыһар спордугар федерациятын председателинэн үлэлээбит, II – с Лөгөй, Чэриктэй, Баатаҕай нэһилиэктэрин бочуоттаах олохтооҕо Семен Семенович Иванов туһунан ахтыы кинигэтин 1 чааһын биһирэмэ буолан ааста.

Тэрээһиҥҥэ Семен Семенович дьиэ кэргэнэ, бииргэ үөрэммит, үлэ үөһүгэр, спорка алтыспыт чугас доҕотторо, табаарыстара, аймахтара кыттыыны ыллылар.

Семен Семенович туһунан кинигэ “Мүрү саһарҕата” хаһыакка таҥыллан Дьокуускай куорат “Дани-Алмас” кинигэ кыһатыгар 200 ахсаанынан 348 сирэйинэн бэчээттэнэн таҕыста. Кинигэ халыҥ магнитынан тутуллар тастаах, үрдүк хаачыстыбалаах офсетнай маатабай кумааҕыга бэчээттэнэн тахсыбыт.

Кинигэҕэ Семен Семенович олоҕун, үлэтин кэпсиир ахтыылар, хаартыскалар, үлэ ситиһиитин көрдөрөр наҕараадалар, видеолар кю-ар кодтанан киирбиттэр. Түһүмэх аайы элбэх өҥнөөх хаартыскалар кинигэ ис тутулун ситэрэн биэрэллэр. Хомуйан оҥордулар: кэргэнэ Лена Егоровна Иванова, эдьиийэ Маргарита Семеновна Находкина, балта Варвара Николаевна Копырина. Сүрүн редактор Наталья Гаврильевна Попова кинигэ ураты дизайннаах тахсыытыгар саҥа сонун көрүүнү киллэрэн биэрбит. Кинигэ уопсайа 10 түһүмэхтэн турар, ааҕааччы киэҥ араҥатыгар ананар.