Олунньу 5 күнүгэр, Сергей Степанович Васильев – Борогонскай аатынан киин библиотекаҕа, биир дойдулаахпыт Дүпсүн нэһилиэгиттэн төрүттээх Евстафий Федорович Федоров "Уус Алдан оройуона Сэбиэскэй Сойуус Аҕа дойдуну көмүскүүр Улуу сэрии сылларыгар"  кинигэ биһирэмэ ыытылынна.

Ааспыт үйэ 60 сылларыгар хомуйуллубут үлэ матырыйаалларынан ааптар кыыһа Евдокия Евстафьевна Федорова көҕүлээн кинигэ таһаартарбыт. Бу матырыйаалага Уус Алдан улууһа 1930 сыллартан саҕалаан, Аҕа дойдуну көмүскүүр Улуу сэрии кэмин хабан туран улуус административнай,

хаһаайыстыбаннай уонна экономическэй араҥаҕа үлэтин-хамнаһын, балаһыанньатын көрдөрөр дааннайдары ыйар. Ааҕааччы киэҥ араҥатыгар, кыраайы, историяны үөрэтээччилэргэ ананар.

Тэрээһин кыттыылаахтарыгар "Алгыс" кыраайы үөрэтэр отдел сэбиэдиссэйэ О.Н.Павлова кинигэни сиһилии ырытан кэпсээтэ. Кинигэ биһирэмигэр кэлбит ыалдьыттар бэйэлэрин санааларын ирэ-хоро кэпсэтэн, "Кыайыы туһугар" диэн быыстапканы сэҥээрэ көрөн тарҕастылар. Биһиги  эйэлээх олохтоох дойдубутун, норуоппутун көмүскүүр, харыстыыр туһуттан бэйэлэрин эдэр саастарын, сырдык тыыннарын толук ууран, хорсуннук охсуспут, тыылга күнү-түүнү аахсыбакка турууласпыт көлүөнэни үйэтитэр ытык иэспит буолар.