Биир нэдиэлэ устата улууспут нэһилиэктэринэн, тэрилтэлэринэн, оскуолаларынан, оҕо уһуйааннарынан тэрээһиннээхтик ааста. Библиотечнай уроктар, бэсиэдэлэр, быыстапкалар, оскуолаларга кылаас чаастара, күрэстэр ыытыллыннылар. Ол буолбут тэрээһиннэргэ уһулуччулаах бэйиэт Г.Г. Вешников-Баал Хабырыыс 100 сылын туолар бэлиэ сылыгар кини олоҕун – дьаһаҕын, айар үлэтин туһунан сырдатыллынна.
Тэрээһиннэр "Тойон Мүрү" сынньалан киинигэр, культура, «Өркөн» оҕону эбии үөрэхтээһин киинигэр, СЭС, ОДьКХ, социальнай управленияҕа, реабилитационнай кииҥҥэ, нэһилиэк дьаһалтатыгар, «Мүрү Саһарҕата» айар – полиграфическай холбоһук дьилэригэр, уо.д.а. ыытыллыннылар.
“Сыккыс” бибилэтиэкэҕэ “Айар иэйиигэ куустаран” литературнай күрэс, “Төрөөбүт тылгын төһө билэҕин?” викторина болҕомтону тарта. Мүрү 1№-дээх оскуолатыгар, «Мүрүчээнэ» оҕо уһуйааныгар «Ийэ тылбар, сахалыы саҥабар тирэҕирэн» форумҥа «Сахалыы иитии уйулҕата» секцияларынан үлэ олус сэргэх тэрээһин буолла. Манна саха тылын учууталлара, оскуола, нэһилиэк бибилэтиэкэтин үлэһиттэрэ, оҕо уһуйаанын иитээччилэрэ, төрөппүттэр кыттыыны ылбыттара. Тирээн турар кыһалҕалары дьүүллэстилэр, инники үлэ соруктарын кэпсэтии, санаа уллэстиитэ буолла. Нэһилиэктэр оскуолаларыгар аман өс күрэхтэр, диктант, Ток-шоу, интеллектуальнай оонньуулар, брейн ринг. Оҕо уһуйааннарыгар саха тылын туһунан бэсиэдэ, оҕо суруйааччыларын билиһиннэрии, тэттик хоһоон ааҕыыта уо.д.а. тэрээһиннэр ыытыллыннылар. Тэрилтэлэргэ күргүөмүнэн сахалыы хоһооннору аахтылар, диктант суруйдулар дьон-сэргэ улаханнык үөрэрин, долгуйарын биллэрдэ. Курбуһах нэһилиэгэр Баал Хабырыыс төрөөбүтэ 100 сылыгар аналлаах улуустааҕы «Күн бытархайа» ыччат фестивала буолан ааста.
Бороҕоҥҥо Т. Находкина “Үлэ – дьылҕам бэлэҕэ” кинигэтин сүрэхтэниитэ, Мүрү 1 №-дээх оскуолатыгар тыыл уонна педагогическай үлэ бэтэрээнэ В.М. Троева аатыгар аналлаах саха тылыгар уонна литературатыгар 4-с кылаас үөрэнээччилэригэр олимпиада, 2 №-дээх оскуолаҕа “Төрөөбүт тыл түмэр түһүлгэтэ” үөрэнээччилэр хамаанданан күрэстэһиилэрэ, о.д.а. тэрээһиннэр тиһиктээхтик ыытыллыннылар.
Төрөөбүт тыл, сурук-бичик күнүн чэрчитинэн, нэдиэлэ устатыгар улуус олохтоохторо көхтөөхтүк кытыннылар, бэлэмнэрин биллэрдилэр.
