Өрөспүүбүлүкэ успуордун сайдыытыгар сүҥкэн кылаатын киллэрсибит талааннаах салайааччы, дьоһуннаах тэрийээччи, Саха сиригэр успуорт сайдар суолга киириитин тэрийбит, көҥүл тустууну төрүттээбит, саха спортсменнара аан дойду түһүлгэтигэр тахсар кыахтаахтарын өтө көрбүт, биллиилээх судаарыстыбаннай, уопсастыбаннай деятель, ССРС физическэй култууратын туйгуна Николай Николаевич Тарскай 100 сылын түмүктүүр үөрүүлээх тэрээһин киин куораппыт килбэйэр киинигэр – П.А. Ойуунускай аатынан саха академическай театрыгар буолла.
Өрөспүүбүлүкэ успуордун сайдыытыгар сүҥкэн кылаатын киллэрсибит талааннаах салайааччы, дьоһуннаах тэрийээччи, Саха сиригэр успуорт сайдар суолга киириитин тэрийбит, көҥүл тустууну төрүттээбит, саха спортсменнара аан дойду түһүлгэтигэр тахсар кыахтаахтарын өтө көрбүт, биллиилээх судаарыстыбаннай, уопсастыбаннай деятель, ССРС физическэй култууратын туйгуна Николай Николаевич Тарскай 100 сылын түмүктүүр үөрүүлээх тэрээһин киин куораппыт килбэйэр киинигэр – П.А. Ойуунускай аатынан саха академическай театрыгар буолла.
Кэрэ бэлиэ күҥҥэ Николай Николаевич Тарскайга аналлаах үбүлүөйдээх тэрээһиннэри сүрүннүүр өрөспүүбүлүкэтээҕи тэрийэр кэмитиэт салайааччыта, Саха Өрөспүүбүлүкэтин Бырабыытылыстыбатын бэрэссэдээтэлин солбуйааччы Сергей Местников, Ил Түмэн депутата, олимпийскай призер Георгий Балакшин, Саха Өрөспүүбүлүкэтин физическэй култуураҕа уонна успуорка миниистирэ Леонид Спиридонов, Уус Алдан улууһун баһылыга Василий Аммосов, Баатаҕай нэһилиэгин баһылыга Михаил Белолюбскай бэйэлэрин эҕэрдэлэрин эттилэр уонна бастыҥ үлэлээхтэргэ наҕараадалары туттардылар.
Наҕараадаламмыттар ортолоругар СР физическэй култуураҕа уонна маассабай успуорка управлениетын специалиһа Зинаида Афанасьева, спорду көҕүлээччи, тэрийээччи Виктор Портнягин, Уус Алданнааҕы библиотека тиһигин үлэһитэ Мария Попова, СР Спорка Албан аатын түмэлин салайааччы Михаил Друзьянов, Н.Н. Тарскай аатынан “Төлкөлөөх түөрэх” спектакль ааптара, суруналыыс Иннокентий Сыроватскай, спорт бэтэрээнэ Ирина Басыгысова уо.д.а. бааллар.
Успуорт уонна култуура бэтэрээнэ, ССРС физическэй култууратын туйгуна, Саха Өрөспүүбүлүкэтин култууратын үтүөлээх үлэһитэ, норуодунай артыыс Аркадий Михайлович Алексеев сыанаҕа ыҥырыллан тахсан, Н.Н. Тарскайы кытта хайдах көрсүбүтүн, кэпсэппитин туһунан ахтыыта болҕомтону тарта.
Ити курдук, бүгүҥҥү үөрүүлээх тэрээһиҥҥэ Николай Николаевич Тарскай сиэнэ, Дьокуускай куорат 31 №-дээх оскуолатын дириэктэрин солбуйааччы Людмила Александровна Кулагина кыттыыны ылан, сыл устата элбэх күрэхтэһиилэр, быыстапкалар, тэрээһиннэр үрдүк таһымнаахтык ыытыллыбыттарыгар – тэрийээччилэргэ, үлэлэспит бары дьоҥҥо махтанна. Бу бастатан туран, Н.Н. Тарскайы билинии уонна киниэхэ ытыктабыл, сүгүрүйүү буоларын санатта.
Үөрүүлээх тэрээһин салгыы Владимир Заболоцкай, Анастасия Готовцева, Варя Аманатова, Семен Иванов уо.д.а. Уус Алдан бастыҥ ырыаһыттарын киэҥ ис хоһоонноох кэнсиэринэн ситэриллэн, киэркэйэн биэрдэ. Хаһан баҕарар буоларыныы, “Кэнчээри” ансамбль ырыаһыттара үрдүк таһымнаахтарын көрдөрдүлэр. Өссө Найахыттан, Тандаттан ансамбллар, Баатаҕайтан хор ырыалара эмиэ дохсун ытыс тыаһынан бэлиэтэннилэр.
Киэҥ далааһыннаах, дириҥ толкуйдаах тэрийээччи, дьоҕурдаах салайааччы Николай Николаевич Тарскай билиитэ-көрүүтэ силис-мутук тардан, салгыы сайдан, бүгүҥҥү кэмҥэ успуорка үтүө түмүктэри биэрэ турдаҕа. Онуоха, саха спортсменнара Сойууска, аан дойдуга биллэр, аатырар буолууларыгар ааны аспыт, олук үктээбит киһибитин үйэ-саас тухары умнуо суохтаахпыт. Кини аатын өрүү дорҕоонноохтук ахта, саныы, кэлэр көлүөнэҕэ тиэрдэ туруохтаахпыт. Ол эбэтэр, киһи суола, хаалларбыт үлэтэ-хамнаһа сүтүө-симэлийиэ суохтаах!
“Дьулурҕан” (Петр Павлов хаартыскалара)
