Бүгүн, ахсынньы 12 күнүгэр, С.С. Васильев – Борогонскай аатынан улуустааҕы киин библиотека ааҕар саалатыгар Россия Конституциятын күнүгэр улууспут эдэр олохтоохторугар Россия гражданиннара буолбуттарын туоһулуур докумуону – пааспары туттарыы үөрүүлээх тэрээһинэ ыытылынна.   

Бары билэрбит курдук Российскай Федерация 1993 сыллаахха Конституцияны норуот бүттүүн куоластааһынынан ылыммыта аныгы демократическай Россия историятын биир тутаах түгэнинэн буолбута.

Тэрээһиҥҥэ “Биир Ньыгыл Россия” политическай партия  Уус Алданнааҕы салаатын толорооччу сэкэрэтээрэ Күннэй Петровна Рощина улуус дьаһалтатын, партия аатыттан оҕолорго эҕэрдэ суруктары туттарда, улуустааҕы үөрэх управлениетын солбуйар начальнига Иван Иванович Никонов Россия Конституциятын историятын, суолтатын иһитиннэрдэ. “Бастыҥнар хамсааһыннара” Россиятааҕы оҕо уонна ыччат түмсүүтүн куратора Мария Платоновна Винокурова оҕолорго сэмэй бэлэҕин туттарда. Мүрү 2 №-дээх орто оскуолатын 5 кылааһын үөрэнээччитэ Алик Стручков музыкальнай эҕэрдэтин тиэртэ.

Миграционнай сулууспа улуустааҕы салаатын салайааччыта Александра Тимофеевна Окоемова 20 эдэр гражданнарга пааспардары, өйдөбүнньүк бэлэхтэри туттарда.

Оҕолор Россия гражданина буолбуттарын туоһулуур олохторун биир саамай сүрүн докумуонун тутан Ийэ дойдуларын, Өрөспүүбүлүкэлэрин, төрөөбүт улуустарын чиэһин көмүскүүргэ, бэриниилээх буолууга эппиэтинэһи ылан тарҕастылар.