Ыам ыйын 25 күнүгэр, Кэптэнигэ, улууспутугар Библиотечнай систиэмэ 100 сылыгар, Лөгөйбүт нэһилиэгэр Үйэтитии сылын чэрчитинэн, ыам ыйын 27 күнүгэр Бүтүн Арассыыйатааҕы Библиотекарь күнүн көрсө уонна Лөгөй нэһилиэгэр өр кэмҥэ библиотекарынан үлэлээбит, дьон сэргэ махталын, убаастабылын ылбыт Мария Сергеевна Попова төрөөбүтэ 100 сылыгар аналлаах ахтыы тэрээһин ыытылынна. Тэрээһини М.С. Попова оҕолоро, сиэннэрэ, Кэптэнитээҕи модельнай библиотека, Б. Оҕотоойоп аатынан сынньалаҥ киинэ, Лөгөй лицей- интернатын библиотеката тэрийэн ыыттылар.

Нэдиэлэ устата тэрээһин чэрчитинэн кэтэхтэн билиини - көрүүнү хаҥатарга уонна бэйэни тургутан көрөргө өрөспүүбүлүкэ, улуус, нэһилиэк библиотекаларын уонна М.С. Попова туһунан викторина ыытылынна. Викторина түмүгүнэн кыайыылаахтарынан М.А. Дьяконова - 1миэстэ, Л.П. Бурнашева - 2 миэстэ, В.С. Петухова -3 миэстэ уонна «Өркөн өй» анал ааты ылары ситистэ - Т.П. Спиридонова.

Улууска, нэһилиэккэ «ааҕар дьиэлэр» тэриллиилэрин туһунан, Кэптэни библиотекатыгар үлэлээн ааспыт дьон туһунан библиотекарь Туйаара Иннокентьевна Борисова иһитиннэрии оҥордо.

Тэрээһиҥҥэ биир ураты кинигэ быыстапката турда, ол курдук «Кинигэ алыптаах эйгэтэ» диэн 6 салаалаах: сэдэх, былыргы, кэрэхсэбиллээх, «биир кинигэ историята» салаа, аныгы моһуоннаах, дьиэ кэргэн библиотекаларыттан араас элбэх интириэһинэй кинигэ кэлэн турда. Ааспыт үйэ саҕаланыыта тахсыбыт кинигэттэн саҕалаан былыргы тылынан - өһүнэн, урукку суругунан- бичигинэн тахсыбыт, сериянан, тиэмэнэн мунньуллубут, идэлэринэн наардаммыт, аҕыйах ахсаанынан тахсыбыт, ураты киһи илии баттааһыннаах, ытыс саҕа, тыҥырах саҕа, аарыма кинигэлэр быыстапкаланнылар. Ол курдук бэйэлэрин дьиэтээҕи библиотекаларыттан дьоҥҥо-сэргэҕэ көрдөрүүгэ туруордулар Сыроватская В.Е., Попова М.Ф., Лөгөй лицей- интернатын библиотекаря Копырина С.М., Бережнева А.В., Шарина Е.Д., Бурнашева М.Е, Александрова С.Г,, Матвеева М.Д., Бурнашева Х.М, Дьяконова М.А., Бурнашева В.И., Андросова М.Н., Мигалкина М.С., Колесов А.П., Лугинова З.П., Перевалова А.И.. Нэһилиэк олохтооҕо, ветеран учуутал алта салааттан түөрдүгэр быыстапкалаабыт Валентина Ивановна Бурнашева туруорбут кинигэлэрин туһунан иһитиннэрии, хайдах бу кинигэ дьиэ библиотекатыгар баар буолбутун туһунан, дьиэ кэргэн кэриэстэбил, биир киэн туттар, харыстыыр кинигэлэрин туһунан дьон- сэргэ болҕомтотун тарда кэпсээтэ. Эмиэ ветеран учуутал Екатерина Дмитриевна Шарина «биир кинигэ историята» диэнтэн оскуолаҕа сылдьан бастаан бэлэхтэппит Н.К. Крупская туһунан кинигэтин, хас биирдии хаартыскатын историятын билиһиннэрдэ. Агафья Ильинична Перевалова сөбүлүүр Т.Е Сметанин айымньыларынан кинигэтин кэпсээтэ. Кинигэҕэ баар ырыа буолбут хоһоонноруттан бар дьонугар ыллаан иһитиннэрдэ.

Тэрээһин иккис чааһыгар Мария Сергеевна Попова сырдык кэриэһигэр ананна, кыргыттара, аймахтара, бииргэ үлэлээбит, алтыспыт дьоно истиҥник-иһирэхтик аҕыннылар. Удьуор уус Поповтар аймах хантан хааннаахтарын, кимтэн кииннээхтэрин билиһиннэрдилэр, тарбаҕар талааннаах, мындыр дьоннорун туһунан киэҥ сэҥээриини ыла кэпсээтилэр. Бороҕонтон, Чараҥтан кэлбит М.С. Попова балтылара З. С. Лугинова, кийииттэрэ Е.М. Попова эдьиийдэрин туһунан сылаастык ахтан бардылар, норуот маастара, РСФСР айар худуоһунньуктарын союһун чилиэнэ, Аан дойдутааҕы, Арассыыйа иискэ- ууска куонкурустарын Лауреата, Уус Алдан бочуоттаах олохтооҕо, улуус ыһыаҕар иистэнньэҥнэр түһүлгэлэрин куонкуруһун тэрийээччи- М.С. Атласова- Иис Маарыйа; норуот маастара, «Айар иис» 3 саас оскуола куруһуогун салайааччыта, Гиннес рекорд кинигэтигэр киирбит үлэлээх- Г.С. Охлопкова кэлэн бэйэлэрин быыстапкаларын туруоран, Кэптэни олохтоохторугар иис туһунан бэрт кэрэхсэбиллээх кэпсэтиини тэрийдилэр.

Үйэтитии сылыгар ыытыллыбыт «Лөгөй сирин ытык дьоно» проект ааптара З. П. Лугинова салгыы бу кэскиллээх проект туһунан ыллыктаах санаатын үллэһиннэ. Тэрээһини тэрийээччилэр киирбит уонна кэпсэммит ахтыылар бэчээттэнэн тахсалларын, салгыы биир кэлим үлэ буоларыгар баҕа санааларын эттилэр. Проект бастакытын ыытыллыбыт тэрээһинигэр, М.С. Попова кыргыттарыгар Дария Николаевна Охлопковаҕа, Мария Николаевна Исакановаҕа улууспут библиотеката, нэһилиэк дьаһалтата истиҥник махтаннылар.

Дьон- сэргэ киириэхтэн саламааттаах, алаадьылаах айах тутууттан саҕалаан, ырыалаах- тойуктаах, ирэ- хоро кэпсэтиилээх, кэрэхсэбиллээх кинигэ быыстапкалаах, аан дойдуга биллибит иис быыстапкалаах, интириэһинэй дьонноох-сэргэлээх Мария Сергеевна Попова 100 сааһыгар анаммыт тэрээһинтэн астына тарҕастылар.

Киһи ахтылларын тухары тыыннаах, тыыннаах кини кэрэ мөссүөнэ, сырдык дууһата, кэнэҕэски ыччакка кэпсэнэрин тухары үтүө киһи аата- үйэлэргэ умнуллубат!

Валентина Иннокентьевна Тищенко,
Лөгөй лицей - интернат оскуолатын саха тылын учуутала