Олунньу 22 күнүгэр улуустааҕы кииннэммит библиотекаҕа Аҕа дойдуну көмүскээччилэр күнүн көрсө “Мин Россия гражданинабын” диэн бырайыак чэрчитинэн үөрүүлээх быһыыга - майгыга паспорт туттарыы тэрээһинэ буолла. Бу бырайыак “Биир ньыгыл Россия” партия улуустааҕы исполкома, кииннэммит библиотека тиһигэ, “Билии” общество улуустааҕы салаата, федеральнай миграционнай сулууспа, «Инникилэр хамсааһыннара» Россиятааҕы оҕо уонна ыччат түмсүүлэрэ кыттыылаах үтүө үгэскэ кубулуйбут тэрээһин буолан ааста.
Тэрээһиҥҥэ Уус Алдан улууһа (оройуона) МТ баһылыгын солбуйааччы Анатолий Дмитриевич Сторожев, паспортнай миграционнай сулууспа улуустааҕы отделын салайааччыта Александра Тимофеевна Окоемова Уус Алдан эдэр олохтоохторугар Россия Гражданиннара буолбуттарын туоһулуур докумуону - пааспардары үөрүүлээх быһыыга туттардылар. Тэрээһиҥҥэ «Инникилэр хамсааһыннара» Россиятааҕы оҕо уонна ыччат түмсүүтүн муниципальнай куратора Мария Платоновна Винокурова оҕолорго эҕэрдэ бастыҥын тиэрдэн туран бэлэхтэри туттардылар, тэттик ыйытыктаах биктэриинэ ыыттылар.
С.С. Васильев – Борогонскай аатынан киин библиотека библиотекара Т.Д.Бурцева паспорт историятын туһунан билиһиннэрдэ, электроннай ресурса отделын библиотекара М.Н. Оллонова Пушкинскай каартаны туттуу-туһаныы быраабылатын кэпсээтэ. Төрөппүттэр ааттарыттан эҕэрдэ тылы Михаил Васильевич Ушницкай тиэртэ. Оҕолор ааттарыттан мэктиэ тылы Мүрүтээҕи уолаттар гимназияларын VIII кылааһын үөрэнээччитэ Николай Тарскай эттэ. Эдэр гражданнары эдьиийдии - балыстыы Уйгулаана уонна Кыыдаана Бочкаревалар ылбаҕай ырыанан эҕэрдэлээтилэр. Тэрээһин уопсай хаартыскаҕа түһүүнэн түмүктэннэ.