Бу дьыл тохсунньу 30 күнүгэр, Баатаҕай нэһилиэгэр биллэр государственнай деятель, Саха сиригэр физкультурнай, спортивнай хамсааһыны төрүттээбит биир дойдулаахпыт Николай Николаевич Тарскай төрөөбүт күнүгэр диэри оруобуна 100 хонук хаалбытын уонна нэһилиэккэ ТАРСКАЙ СЫЛА арыллыытын үөрүүлээх быһыыга-майгыга бэлиэтээтибит.

Тэрээһин үөрүүлээх аһыллыыта спортсменнар парадтарынан саҕаланна.

Бу тэрээһини иилээн-саҕалаан ыыттылар нэһилиэккэ тэриллибит спортивнай Сэбиэт, ол курдук нэһилиэк спортинструктора Готовцев Степан Анатольевич, энтузиаст педагог, чөл олоххо, спортка уһуйааччы Николаев Николай Адамович, Н.Н. Тарскай аатынан Баатаҕай орто оскуолатын физкультура учууталлара Ядрихинскай Алексей Алексеевич уонна Готовцев Ян Русланович.

Тарскай үбүлүөйдээх комиссията парады көрүстэ, ылыныллыбыт былааннары билиһиннэрдэ. Орто оскуола "Уолан" уолаттар бөлөхтөрө монтаж ааҕан, "Биэттэ" эр дьон ансаамбыла ыллаан, оскуола оҕолорун гимнастическай номердара тэрээһини киэргэттэ. Үөрүүлээх аһыллыы кэннэ нэһилиэк тэрилтэлэрэ, түөлбэлэрэ уопсайа 8 хамаанда үс көрүҥҥэ: дартска, мүһэ былдьаһыытыгар, уксааҥҥа күөн көрүстүлэр. Олохтоох дьаһалта, орто оскуола, "Күнчээн" уһуйаан, Баатаҕайдааҕы фельдшерскэй пуун уонна "Түмэн" НАК, ЖКХ, библиотека уонна почта, "Аргыс", "Дабаан", "Сарыал" түөлбэ хамаандалара күрэс былдьастылар. Тыҥааһыннаах киирсии түмүгүнэн I м. - "Аргыс" түөлбэ, II м. - олохтоох дьаһалта, III м. - "Дабаан" түөлбэ хамаандалара тигистилэр. Бэлиэ күҥҥэ улуус кииниттэн "Мүрү саһарҕата" хаһыат уонна Саха НКИК филиалын үлэһиттэрэ ыалдьыттаан бардылар.

Николай Тарскай үбүлүөйдээх сылын, биир дойдулаахтара өрө көтөҕүллүүлээхтик көрсөргө, үрдүк таһымнаахтык ыытарга бэлэммитин биллэрэбит! Үтүө киһи аата үйэлэргэ ааттаннын!

Августина Пермякова

М.К. Федорова аатынан Баатаҕай олохтоох библиотекатын сэбиэдиссэйэ.