Бүгүн сэтинньи ый 3 күнүгэр С.С.Васильев-Борогонскай аатынан киин библиотека ааҕар саалатыгар Норуоттар икки ардыларынааҕы «Улахан этнографическай  дьыктаан»  аахсыйа ыытылынна.

            Аахсыйа «Норуот элбэх – дойду биир!» диэн бэргэн этиинэн  салайтаран, Норуот сомоҕолоһуутун күнүн чэрчитинэн, быйыл номнуо ахсыс төгүлүн ыытыллар. Тэрээһин сүрүн сыала-соруга – араас омуктары сомоҕолооһун, Россияҕа уонна кыраныысса таһыгар олорор биир дойдулаахтарбыт бэйэлэрин төрүттэрин, өбүгэлэрин үгэстэрин, абыычайдарын үөрэтэр баҕаларын көҕүлээһин.

              «Улахан этнографическай дьыктаан» аан бастаан 2016 сыллаахха сэтинньи 4 күнүгэр ыытыллыбыта. Онно Арассыыйа 90 тыһыынча кэриҥэ олохтооҕо кыттыбыта. Оттон 2022 сылга акцияҕа 4 мөлүйүөн киһи Арассыыйаттан уонна араас дойдулартан кыттыбыттара.

           Киин библиотека  площадкатыгар быйыл 25 кыттааччы бэйэтин билиитин тургутан көрдө.  Тэрээһин кыттааччыларыгар улуустааҕы култуура управлениетын начальнига Сергей Сергеевич Нафанаилов бэйэтин эҕэрдэтин эттэ уонна ситиһиилэри баҕарда. Түмүк тахсыар дылы кыраайы үөрэтэр салаа библиотекара Мария Заболоцкая библиотека фондатыттан этнографияҕа сыһыаннаах кинигэлэр тустарынан бэсиэдэ оҥордо.

            Дьыктаан улуус кииннэммит библиотекатын тиһигин бары библиотекаларыгар ыытыллар.

            Мэлдьи билиигэ-көрүүгэ тардыһар ааҕааччыларбытыгар кэлэн кыттыбыккытыгар махтанабыт.

           Санатан эттэххэ акция miretno.ru официальнай сайтка сэтинньи ый 3 күнүттэн 8 күнүгэр дылы онлайн эмиэ ыытыллар.

          2abd7b78 2a0b 4f1a 9917 0f84945f0e815ee280ab 3a4b 4784 bc15 75902b9e7d97876cf19e cffb 41e3 a70e 59209308fde8