Бүгүн, алтынньы 6 күнүгэр Саха Өрөспүүбүлүкэтин народнай суруйааччыта, Саха сирин норуотун хаһаайыстыбатын үтүөлээх үлэһитэ, Үөһэ Бүлүү, Амма, Томпо улуустарын бочуоттаах олохтооҕо Дмитрий Федосеевич Наумов үбүлүөйдээх 75 сааһын туолла.

Бу бэлиэ күҥҥэ, Уус Алданнааҕы кииннэммит библиотека тиһигэр Д.Ф. Наумов  сабыс саҥа бэчээттэнэн тахсыбыт «30 кэпсээн», «Ааспыт үйэ оҕолоро, аныгы үйэ оҕонньотторо» диэн кинигэлэрин ытыктыыр биир дойдулаахпыт, Ил Түмэн бэрэссэдээтэлин  I  солбуйааччыта Александр Николаевич Жирков чугас  доҕоро, Дмитрий Федосеевич Наумов тус бэйэтин аатыттан, аан бастакынан биһиги улууспут бары библиотекаларыгар, ааҕааччыларыгар бэлэх ууммутун,  Ил Түмэн бэрэссэдээтэлин  I  солбуйааччыта  А. Н. Жирков көмөлөһөөччүтэ Ньургустаана Юрьевна Гуляева туттарда.

Ааптар, Д.Ф. Наумов билиҥҥи кэм биир саамай биллэр, ааҕыллар суруйааччыта буолар. Кини тыа сирин олоҕун араас өрүттэрин көрдөрөр кэпсээннэрин,билиҥҥи олох эриирдээх ыйытыктарыгар эппиэттээри саҥа суолу көрдүүр, ол туһунан бу кинигэлэргэ ааҕыахха сөп, кинигэ бэйэтин  ааҕааччытын булуоҕар  эрэнэбит.