Былатыан Ойуунускай аатынан саха академическай тыйаатырын артыыстара гастрол чэрчитинэн улуустааҕы оҕо, ыччат, дьиэ кэргэн ааҕар киинин ааҕааччыларын, төрөппүттэрин, олохтоохторун кытары атах тэпсэн олорон өрө көтөҕүллүүлээхтик сэһэргэстилэр. Манна биһиги сөбүлүүр артыыстарбыт Зоя Петровна Багынанова, Надежда Ушницкая, Елизавета Потапова, Елена Сергеева - Румянцева, Петр Садовников, Иннокентий Луковцев, Александра Сивцева, Геннадий Турантаев, Илья Портнягин, Павел Ченянов, Айсен Лугинов бааллар.
"Театр алыптаах эйгэтэ" быыстапканы С.С.Васильев - Борогонскай аатынан Киин библиотека кыраайы үөрэтэр отделын сэбиэдиссэйэ О.Н.Павлова билиһиннэрдэ. Тыйаатыр төрүттэниитигэр биһиги биир дойдулаахтарбыт П.Охлопков- Наара Суох, В.В.Никифоров - Күлүмнүүр улахан оруоллаахтарын сырдатта.
"Өркөн" оҕону эбии дьарыктыыр киин иһинэн үлэлиир "Бенефис" театральнай куруһуок оҕолоро, педагогтара бэлэмнээбит теневой испиктээги көрдөрөн, аныгы технологиянан кыылы -көтөрү саҥардан көрөөччүлэр биһирэбиллэрин ыллылар. Көрсүһүү кыттыылаахтара артыыстарбытыгар бииртэн биир сэргэх боппуруостары биэрэн, онно сөптөөх эппиэти ылан үөрэн - көтөн, дуоһуйан, бэлэх бэрсэн, алгыс этэн тарҕастылар.
