Олунньу 14 күнүгэр С.С.Васильев – Борогонскай аатынан улуустааҕы киин библиотекаҕа “Ийэ тылым – омугум тыына” диэн төрөөбүт тыл, сурук – бичик күнүгэр, СӨ Үлэ сылыгар, биир дойдулаахпыт Н.Д.Бурцев төрөөбүтэ 105 сылыгар аналлаах улуустааҕы “Аман өс” күрэс үрдүк таһымнаахтык ыытылынна. Күрэһи улуус дьаһалтата, култуура, үөрэх управлениелара, кииннэммит библиотека тиһигэ тэрийэн ыыттылар.
Күрэскэ оскуола оҕолоро, эдэр ыччат уонна улахан дьон, ол иһигэр кэтэхтэн 15 киһи, барыта 30 киһи кытынна. Бастакы бөлөххө 8-11 кылаас оҕолорун ортотугар хатыһыылаах күрэс түмүгүнэн кыайыылааҕынан Портнягин Тимур – Мындаабатааҕы спортивнай хайысхалаах орто оскуола 11 кылааһын үөрэнээччитэ (сал.Васильева Н.Е.) таҕыста, иккис миэстэ – Мүрү 1№-дээх орто оскуолатын 9 кылааһын үөрэнээччитэ Ньургуйаана Бурнашева (сал.Аргунова Л.В.), үһүс миэстэни - Мүрү 1№-дээх орто оскуолатын 11 кылааһын үөрэнээччитэ Айыына Рожина (сал.Аргунова Л.В.), биһирэбил бириистэринэн наҕараадаланнылар – Чараҥ орто оскуолатын 10 кылааһын үөрэнээччитэ Леонида Иванова (сал.Ушницкая С.И.), Мүрү 1№-дээх орто оскуолатын 9 кылааһын үөрэнээччитэ Дайаана Степанова (сал.Бурцева Л.В.) ыллылар.
Эдэр ыччат бөлөҕөр социальнай реабилитационнай киин иитээччитэ Нарыйа Гаврильевна Портнягина эрэллээхтик бастаата, 2 м. - Муома улууһуттан төрүттээх Уус Алданнааҕы техникум студентката Слепцова Олеся, 3 м. – Хоноҕор ситэтэ суох орто оскуолатын учуутала Ньургуйаана Алексеевна Шарапова ылары ситистилэр.
Улахан дьон бөлөҕөр хаһааҥҥытааҕар да элбэх кыттааччы кытынна. Күрэс түмүгүнэн кыайыылааҕынан Суоттуттан Бээрийэ Кыыһа Хотойук Айгыына буолла, 2 м. – Өлтөх нэһилиэгиттэн Игнатий Слепцов, 3 м. – Мүрү нэһилиэгиттэн Марфа Алексеева, биһирэбил бирииһи – Анастасия Сыроватская, Мүрү нэһилиэгэ, Надежда Бубякина, Суотту нэһилиэгэ, Анна Попова, Байаҕантай нэһилиэгэ, Иван Тордуянов – Мүрү нэһилиэгиттэн буоллулар.
Күрэс дьүүллүүр сүбэтигэр үлэлээтилэр: 1 бөлөххө – С.Ардьакыап аат. улуустааҕы история музейын үлэһитэ Крылова М.И., библиотека үлэһиттэрэ Павлова О.Н., Готовцева А.Н.; 2-3 бөлөххө – СӨ суруйааччыларын сойууһун чилиэнэ, өрөспүүбүлүкэтээҕи “Аман өс” күрэх икки төгүллээх кыайыылааҕа Бурнашева У.И., култуура управлениетын сүрүннүүр специалиһа Федорова А.Е., “Кэскил түһэ” ийэ тыл түмсүү салайааччыта Бурцева С.М. Дьүүллүүр сүбэ тыл этээччилэр туттан – хаптан туралларын, тыл этии тэтимин, куолас эгэлгэтэтин, киэҥ эйгэҕэ саҥарар үөрүйэхтэрин, санааларын толору этэллэрин учуоттаатылар.
Сахалыы сайаҕастык саҥарар, иэйиибитин истиҥник этинэр Ийэ тылбыт үйэлэргэ сүппэккэ үүнэ сайда турдун!
