Рейтинг:  5 / 5

Звезда активнаЗвезда активнаЗвезда активнаЗвезда активнаЗвезда активна
 

Бу дьыл алтынньы 7 күнүгэр Тиит - Арыы библиотекатыгар 2-с Байаҕантай нэһилиэгин депутаттарын Сэбиэтин мунньаҕын 12 №-дээх быһаарыытыгар олоҕуран СӨ ыччат политикатын туйгуна, Тиит-Арыы, Байаҕантай нэһилиэгин бочуоттаах олохтооҕо кыраайы үөрэтээччи Александр Иванович Турантаев аата иҥэрилиннэ.  

 

Александр Иванович 1971 сыл кулун тутар 3 күнүгэр Саха АССР Уус Алдан оройуонун Тиит Арыы нэhилиэгэр 7 оҕолоох Иван Николаевич уонна Анна Александровна Турантаевтар дьиэ кэргэннэригэр үһүс оҕонон күн сирин көрбүтэ.

Кыраайы үөрэтии уустук, мындыр үлэтигэр Александр Иванович устудьуоннуур кэмнэриттэн сыстыбыта. Аҕатын сүбэтинэн сурукка тиһиллибэтэх былыргы дьон олоҕун чинчийииттэн саҕалаабыта. 1997-2001 сылларга Тиит Арыы оскуолатыгар дириэктэринэн анаммыта. Оскуола оҕолоругар историяны ырытан, алаастарынан, өтөхтөрүнэн сылдьан, былыр олорон ааспыт биир дойдулаахтарбыт олохторун-дьаһахтарын, үлэлэрин туhунан дакылааттары суруйтарара.

Чинчийэр үлэтин түмүгүнэн төрөөбүт нэһилиэгин туһунан 2 фотоброшюра уонна 8 кинигэ таһаартарбыта, общественнай кэрэспидьиэн быһыытынан улуустааҕы «Мүрү саһарҕата» нэһилиэк олоҕун сырдатар элбэх ыстатыйалары бэчээттэппитэ. Өр сыллаах үлэ түмүгэр «Уус Алданнар Аҕа дойду көмүскээччилэр» хомуурунньукка Тиит Арыы бэтэрээннэрин туһунан матырыйааллар бастакы томҥа киирбиттэрэ. Маны таһынан Аҕа дойду сэриитин буойуннарын пааматынньыгар сэриилэспит сирдэринэн ааттарын мраморга, онтон да атын матырыйаалларга суруйан өлбөөдүйбэт өйдөөбүнньүк оҥорторбута.

Александр Иванович оскуолаҕа үөрэнэр эрдэҕиттэн библиотека бастыҥ ааҕаачыта этэ. Кэлин олохтоох бибилотека үлэтигэр өрүү күүстээх өйөбүл, бастыҥ сүбэһит буолбута. Олохтоох библиотека историятын сиһилии үөрэппитэ. Библиотека 70 сыллаах үөрүүлээх күнүгэр кини көҕүлээһининэн библиотека бастаан тэриллибит дьиэтигэр өйдөбүнньүк сурук турбута.

Кини кыраайы үөрэтиигэ инники элбэх далааһыннаах былааннардаах этэ. Төрөөбүт нэһилиэгин туһунан матырыйааллары хомуйан өссө киэҥ, дириҥ ис хоһоонноох кинигэ таһаартараары бэлэмнии сылдьыбыта.

            Александр Иванович Турантаев олоҕо, үлэтэ барыта биир дойдулаахтарын дьонун-сэргэтин олохторо тупсарыгар, төрөөбүт нэhилиэгэ сайдарыгар анаммыта. Тиит-Арыы библиотеката киэн тутта кини сырдык аатын сүгэр, үтүө киһи туһунан өйдөбүлү үйэтитэр.

14.jpg