Рейтинг:  0 / 5

Звезда не активнаЗвезда не активнаЗвезда не активнаЗвезда не активнаЗвезда не активна
 

Атырдьах ыйын 26 күнүгэр СӨ Национальнай библиотекатын историческай саалатыгар киэҥ туттар биир дойдулаахпыт, талааннаах бэйиэт, бөдөҥ уопсастыбаннай деятель, П.А. Ойуунускай аатынан Судаарыстыбаннай бириэмийэ лауреата Сергей Степанович Васильев-Борогонскай төрөөбүтэ 115 сылыгар аналлаах истиҥ иһирэх ахтыы киэһэтэ ыытылынна. Бу бэлиэ күнү СӨ култууратын үтүөлээх үлэһитэ Татьяна Афанасьавна Гоголева тэрийэн,

иилээн-саҕалаан ыытта. Үөрүүлээх тэрээһиҥҥэ кыттыыны ыллылар поэт айар талааныгар сүгүрүйэр, кини чаҕылхай айымньыларын үөрэтэр-чинчийэр, киэҥ далааһыннаах уопсастыбаннай үлэтин сэҥээрэр биир дойдулаахтара, бииргэ үлэлээбит, алтыспыт чугас дьоно-сэргэтэ - Сергей Васильев төрөппүт кыыһа Вера Сергеевна Васильева, поэт хос сиэнэ Дархан Васильев, оҕону иитиигэ, үөрэтиигэ, Сергей Васильев айар үлэтин үйэтитиигэ үгүс үлэни ыыппыт РФ, СӨ култууратын үтүөлээх үлэһитэ Раиса Реасовна Кулаковская, Ольга Ильинична Стручкова уонна Наталья Гаврильевна Семенова, “Кэнчээри” оҕо образцовай ансаамбыл салайааччыта, СӨ култууратын үтүөлээх үлэһитэ Василий Степанович Парников, Ньурба улууһун баһылыгын сүбэһитэ Игорь Иванович Яковлев, СӨ култууратын туйгуна, Уус Алдан улууһун "Уһуктуу" айар түмсүү салайааччыта Галина Владимировна Аммосова салайааччылаах С.С. Васильев-Борогонскай аатынан улуус Киин библиотекатын үлэһиттэрэ, Суотту нэһилиэгин олохтоох библиотекардара, Мэҥэ Хаҥалас улууһун Киин библиотекатын үлэһиттэрэ.

     Тэрээһин кыттыылаахтара Сергей Васильев олорон ааспыт олоҕун, норуотун туһугар үлэлээбит үтүө үлэтин, суруйааччы сырдык аатын, саха литературатыгар хаалларбыт сүдү нэһилиэстибэтин үйэтитиигэ ыытыллыбыт, ыытылла турар үгүс үлэ тула тус санааларын эттилэр, мустубут дьон олус интириэһинэй, дириҥ ис хоһоонноох дакылааттары иһиттилэр. Тэрээһин ытык ыалдьыта Р.Р. Кулаковская Сергей Васильевы кытта үлэлээбит кэмин иһирэхтик ахтан-санаан ааста, саха норуодунай бэйиэтэ, СӨ суруйааччыларын Сойууһун бэрэссэдээтэлэ Иван Васильевич Мигалкин бэйэтин эҕэрдэтин, ахтыытын тиэртэ,  М.К. Аммосов аатынан ХИФУ А.Е. Кулаковскай институтун научнай үлэһитэ, тыл үөрэҕин магистра Варвара Егоровна Степанова поэт өлбөт үйэлээх айымньыларын ырыппыт үлэтин иһитиннэрдэ, СӨ култууратын туйгуна Наталья Иннокентьевна Мордовская оскуола оҕолоругар Сергей Васильев олоҥхолорун үөрэтии, тарҕатыы туһунан интириэһинэй дакылааты оҥордо. Сергей Васильев Мэҥэ Хаҥалас, Ньурба улуустарыгар ситэриилээх киин комитет бэрэссэдээтэлинэн үлэлээбит сылларыгар оройуоннар сайдыыларыгар киллэрбит улахан кылаатын кэлбит ыалдьыттар истиҥник аҕыннылар. Сергей Степанович төрөөбүт улууһугар поэт аатын үйэтитиигэ анаан ыытыллар үлэни Г.В. Аммосова сырдатта. "Ыччат олоҥхоһут" республикатааҕы түмсүү тэрийээччитэ Ю.П. Борисов, ХИФУ устудьуона Марк Данилов поэт олоҥхолоруттан быһа тардыылары толорон, дьон сэҥээриитин ыллылар. "Кэнчээри" ансаамбыл иитиллээччилэрэ Сэргэй Баһылайап хоһоонноругар суруллубут уостан түспэккэ ылланар ырыалары толорон, киэһэни киэргэттилэр. Түмүккэ суруйааччы аатын салгыы үйэтитиигэ үгүс баҕа санаа, махтал тыл этилиннэ.