Саха АССР төрүттэммит 100 сыллаах үбүлүөйүн чэрчитинэн, киэн туттар биир дойдулаахпыт, Саха талааннаах бэйиэтэ,бөдөҥ общественнай деятеля, П.А.Ойуунускай аатынан судаарыстыбаннай бириэмийэ лауреата Сергей Степанович Васильев - Борогонскай 115 сылын көрсө ый устата былааннаммыт тэрээһиннэр ыытылла тураллар. Бу тэрээһиннэр чэрчилэринэн атырдьах ыйын 25 күнүгэр Ытык Кыһыл Кырдалга

С.С.Васильев- Борогонскай аат. оскуолаҕа уонна бэйиэт музейыгар “Эриэккэс да дойдулаах эбиккин..." тэрээһин истиҥник-иһирэхтик ыытыллыбыта.

Атырдьах ыйын 26 күнүгэр Дьокуускай к. Национальнай библиотека историческай саалатыгар С.С.Васильев - Борогонскайга аналлаах «Үйэлэри үрдүнэн үлдьү көтөн" төгүрүк остуол дириҥ ис хоһоонноохтук ыытылынна.
Атырдьах ыйын 27 күнүгэр Кружало киин сыанатыгар Сергей Степанович Васильев - 115 сылыгар аналлаах
«Сэргэй Баһылаайап көмүс күһүнэ" программалаах бэйиэт айымньыларын түһүлгэтэ буолан ааста. Бу кэскиллээх тэрээһиннэри СӨ култуураларын үтүөлээх үлэһитэ, Уус Алдан улууһун уонна Суотту нэһилиэгин Бочуоттаах олохтооҕо Гоголева Т.А. көҕүлээн, тэрийэн, салайан ыытта.
Суотту нэһилиэгин делегацията: баһылык Иванов В.И., С.С. Васильев - Борогонскай үбүлүөйдээх тэрээһиннэрин комиссиятын бэрэссэдээтэлэ, "Түһүлгэ" СК салайааччыта Гоголева Е.Н., нэһилиэкпит талба талааннааҕа Иванова Е.И., библиотекарьдар Черкашина Р.Н., Осипова И.А. кыттыыны ыллылар. Киэн туттар биир дойдулаахпыт олоҕун, айар үлэтин дьоҥҥо-сэргэҕэ билиһиннэрдилэр. Нэһилиэккэ ыытыллар үбүлүөйдээх тэрээһиннэр тустарынан кэпсээтилэр.
Улууканнаах биир дойдулаахпыт хомоҕой хоһооннорун ааҕан иһитиннэрдилэр,олохтоох мелодист Олексан Заровняев "Эриэккэс да дойдулаах эбиккин" хоһооҥҥо ырыата иһиллэн, экраҥҥа көстөн мустубут дьон кэрэхсэбилин ылла.
Дириҥ ис хоһоонноох тэрээһиҥҥэ кыттыыны ыллылар Бороҕоннооҕу С.С.Васильев - Борогонскай аат. киин библиотека үлэһиттэрин делегацията. Бу делегацияны салайан кэлбит Аммосова Г.В. библиотека киэҥ ис хоһоонноох үлэтин сырдатан кэпсээтэ. Готовцева А.Н. С.Васильев "Барыта оҕолор иһин" быйылгы дьылга үбүлүөйдээх хоһоонун ааҕан иһитиннэрдэ "Кэнчээри" оҕо норуодунай ансаамбылын оҕолорун ырыалара мустубут дьону кэрэ куоластарынан сөхтөрдүлэр. Тэрээһиҥҥэ С. Васильев олоҥхолоруттан талааннаах эдэр толорооччулар толорон иһитиннэрдилэр.
Бэйиэт төрөппүт кыыһа Вера Сергеевна Васильева кыттынна, Уус Алдан киин библиотекатын пуондатыгар аҕатын С.С. Васильев-Борогонскай "Эрчимэн Бэргэн" олоҥхотун Г. Колесов толорбут грампластинкатын бэлэх уунна, тэрийээччилэргэ барҕа махталын тириэртэ. Библиотека коллектива бу күн "Кружало" кииҥҥэ буола турар "Печатный двор Якутии 2022" регионнар икки ардыларынааҕы быыстапкаҕа суруйааччылары кытта авторскай дуогабар түһэрсэн кэскиллээх үлэни ыытта