Атырдьах ыйын 20 күнүгэр 2022 сыл «Кыталыкы» сайылыкка «Удьуор утума» диэн Леонтий Дмитриевич Местников 200, Акулина Васильевна Барашкова 115, Егор Васильевич Местников 95 сылларыгар аналлаах «Кэмээдэ ыччатын» көрсүһүүтэ буолла. Чурапчыттан, Дьокуускайтан, Мэҥэ Хаҥаластан, Бороҕонтон, Уус Күөлтэн, Окоемовкаттан аймах – билэ дьонноро, кэнчээри ыччаттара мустан Окоемовкатааҕы Саха Республикатын норуотун хаһаайыстыбатын үтүөлээх үлэһитэ, И.И. Крафт аатынан Саха Республикатын Ил Дарханын бириэмийэтин «Попечитель уонна меценат» номинацияҕа лауреата, Уус Алдан, Абый улуустарын, Курбуһах нэһилиэгин бочуоттаах олохтооҕо Е.В. Местников аатынан библиотекаҕа мустан, Местниковтар дьиэ-кэргэн музейыгар сылдьан экскурсиялаатылар. Егор Васильевич Местников оҕолоро Анна Егоровна, Алексей Егорович тэрээһиннэринэн «Кыталыкы» сайылыкка көрсүһүү официальнай чааһа буолла. «Удьуор утума салҕанар» фото-альбомнарын бэлэх ууннулар. Чурапчыттан кэлбит Барашковтар аймах «Ытык Бахсы» бастакы кинигэтин библиотекаҕа бэлэхтээтилэр. Араас конкурстары аймахтарынан тэрийэн ыыттылар. Дьоро күн кыттыылаахтара үөрэн –көтөн, ирэ-хоро кэпсэтэн төрүттэрин сайылыгын сибиэһэй салгынынан сайа тыынан, күүс-уох ылан тарҕастылар.