Быйыл, олунньу 13-17 күннэригэр, «Сахалыы дьыктаан» 2014 сылтан ыытыллар СӨ Национальнай бибилэтиэкэтэ итиэннэ ХИФУ РФ Хотугулуу-Илиҥҥи норуоттарын тылларын уонна култуураларын института кыттыһан тэрийэр акция сэттис төгүлүн буолан ааста.

Акция Төрөөбүт тылга, сурукка-бичиккэ аналлаах декада чэрчитинэн сахалыы таба суруйуу үөрүйэҕин олохсутар, иҥэрэр сыаллаах ыытыллар. Төрөөбүт тылга нэһилиэнньэ киэҥ араҥатын болҕомтотун туһаайыы, интириэһин тардыы буолар.

Быйыл акция Николай Денисович НЕУСТРОЕВ 125 сылыгар сөп түбэһэн, дьыктааҥҥа кини кэпсээниттэн быһа тардан, үс сорудахтаах, 250-300 тылтан турар тиэкиһи суруйдулар.

Биһиги улууспутугар акцияны, нэһилиэк оскуолаларын кытта библиотекалар тэрийэн ыыттылар. Нэһилиэнньэ буоларын курдук, бу да сырыыга көхтөөхтүк кытынна. Барыта 21 нэһилиэккэ 59 былаһаакка тэрилиннэ, онно 1450 киһи кэлэн дьыктааны суруйда. Дьыктаан түмүгүн ырыҥалыыр буоллахха, нэһилиэнньэ төрөөбүт тылын билиитин үрдүк таһымнааҕынан сыаналанна.