Республикабыт бастакы Президенэ Михаил Николаев 1996 сыллаахха саха алпаабытын төрүттээччи, бастакы учуонай, лингвист С.А. Новгородов төрөөбүт күнүн - олунньу 13 күнүн, Ийэ тыл күнүнэн биллэрбитэ.
Улуус кииннэммит тиһигин бибилэтиэкэрэ төрөөбүт тыл-өс, сурук-бичик күнүгэр элбэх сэргэх тэрээһини ыыттылар.
Ол курдук, С.С. Васильев-Борогонскай аатынан киин бибилэтиэкэ диктаны суруйууну тэрилтэ үлэһиттэригэр олунньу 12 күнүгэр ыыттылар. Диктаны Иван Мигалкин 65 сааһын көрсө «Сырдык өйдөбүллээх оҕо саас» ахтыытыттан сахалыы тылынан суруйдулар. Диктант түмүгүнэн үгүстэрэ үрдүк сыанаҕа суруйдулар, тэрээһини сэргээтилэр, саха суругун-бичигин, С.А. Новгородов туһунан санаа атастаһыыта буолла. Инникитин да маннык иһитиннэриилэри, тэрээһиннэри күүтэллэрин биллэрдилэр.
Бороҕоҥҥо “Өркөн” оҕону эбии үөрэхтээһин киинигэр, улуустааҕы култуура салалтата, С.С. Васильев–Борогонскай аатынан киин бибилэтиэкэ, В.В. Никифоров–Күлүмнүүр аатынан “Тойон Мүрү” култуура киинэ “Ийэ тылга тирэҕирэн” саха тылын күнүн бэлиэтээтэ.Үөрүүлээх күҥҥэ киин бибилэтиэкэ Баал Хабырыыс төрөөбүтэ 100 сылыгар аналлаах нэһилиэк бибилэтиэкэлэрин икки ардыларыгар ыытыллыбыт куонкурус быыстапкатын тэрийдилэр. Олор истэригэр Тулунаттан төрүттээх Муомаҕа олорор Дегтярев Александр Михайлович, Өнөртөн төрүттээх Босикова Ульяна Дмитриевна-Сыгына, Хомустаахтан Попова Римма Петровна, Мындаабаттан Николай Стручков, Майаҕастан төрүттээх куоракка олорор Габышева Александра Николаевна-Талбаана, Иванов Петр Васильевич, Крылов Александр Семенович, Попова Анна Даниловна, Петрова Роберта Михайловна, Бурцева Раиса Михайловна, Копырина Антонина Власьевна уо.д.а. “Умсулҕан” түмсүү коллекционердара Т.И. Алексеева саха тылыгар, алпаабытыгар аналлаах, М.С. Москвитина саха суруйааччыларын, олоҥхоһуттарын автографтаах кинигэлэрин муспутун туһунан быыстапкаларын дьон кэрэхсии көрдө. Кэнсиэр бырагырааматыгар “Мүрү долгуннара”, “Кэскил түһэ”, “Уһуктуу” түмсүүлэр, ону тэҥэ кииннэммит бибилэтиэкэ кэлэктиибэ хоһоон, литературнай монтаж аахтылар. “Умсулҕан” түмсүү коллекционердара ыллаан дьиэрэттилэр. Муусука нүөмэригэр А. Бечеканова, “Күндүүнэ” вокальнай ансаамбыл, Т. Винокурова, Е. Васильева ыллаатылар.
Саха тылын күнүгэр мустубут дьон норуодунай бэйиэт И.В. Мигалкин “Сахам тыла барахсан” хоһоонун күргүөмүнэн аахтылар. Үөрүүлээх күн В. Бубякина оһуокайынан түмүктэннэ.
