Бэс ыйын 15-16 күннэригэр саха советскай литературатын төрүттээбит суруйааччы, общественнай, государственнай деятель П.А. Ойуунускай төрөөбүтэ 125 сылыгар аналлаах Ытык Таатта ыһыаҕар улууспут айар – суруйар дьоннорун илдьэ баран кэллибит.

Бастакы күн Чөркөөх ыһыаҕар «Мин аатым ааттаныа» Ойуунускайга анабыл хоһооннору уус – уран ааҕыы түһүлгэтигэр Уйбаан Бахсылыырап кыттан 1-кы үктэл кыайыылааҕа буолла. Иккис күн Ытык Таатта Хадаайы ыһыахтыыр түһүлгэтигэр 4-с төгүлүн ыытыллар литературнай пикникка кытынныбыт. Дьүүллүүр сүбэҕэ Наталья Харлампьева, Гаврил Андросов, Ольга Корякина – Умсуура үлэлээтилэр. Биһигиттэн Сардаана Сыроватская, Гаврил Пухов кытыннылар. Барыта 30 суруйар – айар дьон Дьокуускай куораттан («Айар кут» түмсүү), Чурапчыттан, Намтан («Отуу уота»), Уус-Алдантан («Уһуктуу», «Мүрү долгуннара»), Тааттаттан кытыннылар. «Уһуктуу» түмсүү чилиэнэ, «Уолан» гимназия учуутала Сардаана Николаевна Сыроватская «Кэскиллээх айааччы» анал ааты ылла. «Аата ааттанар, ырыата ылланар» республикатааҕы анабыл хоһоон күрэҕэ Иван Иванович Попов – Уйбаан Бахсылыырап «Алгыстаах айааччы» анал ааты ылла. Бу күрэххэ кыттыбыт дьон анабыл хоһоонноро «Аата ааттанар, ырыата ылланар» диэн хомуурунньукка киирдилэр.